Свет
Украинската армија: Русите имаат резерви за уште три дена
Украинската армија објави дека руските војници имаат резерви за најмногу три дена и дека набргу ќе останат без храна, муниција и гориво.
„Поради логистички неуспеси на руските сили, вклучително и неможноста да се доставува гориво за војниците на фронтот, тие се без резерви“, соопшти денеска Генералштабот на вооружените сили на Украина.
„Нападите врз други градови во Украина – како Киев, Чернихив, Суми и Харков – доживеаја уште еден ден стагнација“, додаде Министерството за одбрана.
Британската разузнавачка служба соопшти дека украинските сили ги отфрлаат руските обиди да го освојат Мариупол, град што се смета за клучен за успехот на таканаречената специјална воена операција на Путин, пишува „Дејли мејл“.
Оценката на украинската војска се совпаѓа со ставовите на западните воени експерти, кои рекоа дека руските сили, најверојатно, ќе останат без резерви оваа недела и ќе бидат принудени да прекинат со понатамошна акција додека не пристигне логистичкото засилување.
Поради ова прекинување на нападите, украинските сили би можеле да извршат контранапад. Веќе утринава објавија дека повторно го освоиле градот Макарив на периферијата на Киев преземајќи ја контролата врз клучниот автопат и блокирајќи ги руските напори да го опколат градот од северозапад.
Но, тоа не значи дека армијата на Путин е веќе поразена или дека набргу ќе следува прекин на огнот. Воените експерти велат дека Путин би можел да се одлучи за побрутална и покрвава стратегија во оваа ситуација. Западните лидери, вклучително и Бајден, предупредија дека рускиот претседател во таков случај би можел да прибегне кон употреба на биолошко или хемиско оружје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Саливан: САД нема на располагање ниту еден „Патриот“ систем за противвоздушна одбрана што би можел да го достави до Киев
Советникот за национална безбедност на американскиот претседател, Џејк Саливан, рече дека Вашингтон во моментов нема достапни системи за противвоздушна одбрана „Патриот“ што би можел да му ги достави на Киев.
„Американските системи „патриот“ се распоредени низ целиот свет, вклучително и на Блискиот Исток, за да ја заштитат американската војска. Доколку има можност да се ослободи батерија, ќе ја испратиме во Украина“, рече тој, а пренесе телевизијата „Ем-ес-ен-бси“.
Истовремено, Саливан додаде дека Америка, додека не дојде во ситуација да испрати свои „патриотски“ системи во Украина, ќе работи да ги убеди своите сојузници од Европа да ги испратат своите системи за противвоздушна одбрана.
Свет
Бакингемската палата ја објави здравствената состојба на кралот Чарлс: познато кога ќе се врати на должностите
Кралот Чарлс ќе продолжи со јавните ангажмани следната недела откако е постигнат охрабрувачки напредок во лекувањето на ракот, објави Бакингемската палата.
За кралот тоа нема да биде целосно враќање на официјалните ангажмани, но палатата испраќа позитивни сигнали, јавува Би-Би-Си.
Следниот вторник кралот ќе започне со симболично патување во центар за лекување рак, пренесува медиумот.
Неговите летни планови вклучуваат државна посета, каде што ќе биде домаќин на императорот и царицата на Јапонија.
Во наредните недели, соопштија од палатата, тој ќе преземе неколку надворешни ангажмани.
Свет
Стари книги обложени со отров отстранети од Француската национална библиотека
Властите отстранија четири книги од Француската национална библиотека поради можноста нивните корици да содржат отровен арсен. Имено, некои книги од 19 век, печатени во Британија, имаат смарагдно зелени корици. Арсенот често се користел за боење книги во тоа време.
Научниците од Универзитетот во Делавер во САД ги класифицираа отстранетите томови како потенцијално опасни, но библиотеката вели дека ракувањето со овие книги би предизвикало само мала штета на здравјето. „Ги ставивме во карантин овие дела. Ќе ги анализираме во лабораторија за да можеме да процениме колку арсен е присутен во секој том“, рече портпаролот на Француската национална библиотека, а пренесе Би-би-си.
Списокот на потенцијално опасни книги е составен од „Poison Book Proect“ , иницијатива покрената од научници од Универзитетот во Делавер во соработка со музејот Винтертур во Делавер. Од 2019 година, тимот тестираше стотици корици книги за тешки метали и состави листа на наслови кои се потенцијално опасни.
Издавачите од викторијанската ера користеле арсен за да ги обојат кориците. Светската здравствена организација (СЗО) предупреди на долгорочна изложеност на арсен во водата за пиење и храната, велејќи дека супстанцијата е многу токсична. Сепак, таа не дала никакви упатства за ракување со предмети што го содржат овој отров.
Во 2022 година, библиотекарите во Лидс, Англија открија ретка книга со арсен. Библиотекар ја открил потенцијално отровната книга додека ја споредувал збирката на библиотеката со базата на податоци на проектот „Poison Book“.