Свет
УНИЦЕФ: Повеќе од 400.000 деца раселени во Либан во последните три недели

Повеќе од 400.000 деца во Либан се раселени во изминатите три недели, вели висок претставник на УНИЦЕФ, пренесуваат светските агенции предупредувајќи на изгубената генерација во малата земја, која се соочува со многубројни кризи и сега е вовлечена во војна.
Израел ја засили својата кампања против милитантната група Хезболах со седиште во Либан, вклучително и почнување копнена инвазија по размената на оган со проиранската милитантна група за време на војната со Хамас во Појасот Газа, пренесува АП.
Борбите во Либан принудија 1,2 милион луѓе да ги напуштат своите домови и повеќето од нив побегнаа во Бејрут или северниот дел на земјата во текот на изминатите три недели на ескалација.
Тед Чајбан, заменик-извршен директор на УНИЦЕФ за хуманитарни акции, ги посети училиштата кои се претворени во засолништа за раселените семејства.
„Она што ме изненади е што оваа тринеделна војна зафати толку голем број деца. Додека седиме овде, 1,2 милион деца се лишени од образование. Либанските јавни училишта или станаа недостапни, или беа оштетени од војна, или се користат како засолништа. Последното нешто што ѝ треба на оваа земја, покрај сето она низ кое помина, е ризикот да изгуби неколку генерации“, рече Чајбан.
Иако некои приватни училишта во Либан продолжуваат да работат, јавниот образовен систем е сериозно погоден од војната заедно со најранливите групи во земјата, како што се палестинските и сириските бегалци.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Очајна потрага по преживеани во Авганистан: хеликоптери летаат над урнатините, селата се целосно затрупани по земјотресот

Спасувачките екипи користат хеликоптери за да бараат преживеани во источен Авганистан, каде што силен земјотрес со магнитуда од 6,0 степени во неделата одзеде најмалку 800 животи и повреди околу 1.800 луѓе. Многумина се уште се затрупани под урнатините на куќите во планинските села во близина на границата со Пакистан.
Тешкиот терен и затрупаните патишта ги отежнуваат спасувачките операции, па само во понеделникот беа извршени 90 хеликоптерски летови во покраината Кунар. Некои хеликоптери не можеа да слетаат поради недостапните долини.
Повредените беа префрлени во болницата во Џалалабад, која веќе е преоптоварена со пациенти.
Преживеаните се сведоци на трагедијата – родители кои ги извлекоа своите деца од урнатините сами и семејства кои изгубија неколку членови. „Цели села се срамнети со земја, многумина се уште се затрупани“, изјави еден локален жител за Би-Би-Си.
Талибанската влада апелираше за меѓународна помош. ОН одобри средства за итни случаи, а Велика Британија најави помош од милион фунти преку Црвениот крст и УНФПА. Индија испрати шатори и храна, а дополнителна поддршка ветија Кина и Швајцарија.
Катастрофата го погоди Авганистан во време кога земјата се соочува со суша, глад и намалена меѓународна помош. „На преживеаните итно ќе им треба сместување, засолниште и ќебиња“, соопшти Канцеларијата на ОН за хуманитарни прашања (OCHA).
Фото: принтскрин
Европа
Украински војник кој преживеа ужасна руска тортура исчезна од болница

Војникот на украинската Национална гарда, Владислав Нахорни, кој преживеа ужасна тортура од страна на руските сили, исчезна од болница во Днепарк завчера, потврди денес портпаролката на полицијата, Хана Старчевска. Исчезнувањето го пријавила неговата сопруга, а полицијата почнала обемна потрага, објавува „Киев индипендент“.
33-годишниот војник бил заробен пред неколку недели во близина на Покровск откога неговата бригада ја изгубила својата позиција. Подоцна сведочел за ужасите што ги доживеал опишувајќи како руските војници ги осакатувале другите затвореници пред да им ги пресечат грлата. Тој бил фрлен во јама заедно со уште седум свои соборци, кои неговите џелати ги сметале за мртви.
Во неверојатен пресврт на настаните Нахорни бил единствениот преживеан. И покрај сериозните повреди, тој успеал да лази пет дена пред да стигне до територијата контролирана од Украина.
Тој бил примен во болница во регионот Днепропетровск на 17 август во критична состојба. Изгубил голема количина крв, а раните му гноеле.
Не можејќи да зборува поради операција на гркланот, тој го запишал своето ужасно искуство во дневник. Во него опишал како руските војници им ги ваделе очите на затворениците, им ги сечеле усните, ушите и носовите и ги осакатувале на други начини.
Неговиот случај се надополнува на растечкиот број докази за систематски воени злосторства извршени од руските сили против украинските затвореници. Генералниот обвинител на Украина во јули објави дека Русија, кршејќи ги Женевските конвенции, егзекутирала најмалку 273 украински воени затвореници за време на нивното заробеништво.
фото: принтскрин
Свет
Трамп: Израел порано имаше најсилно лоби, што се случи?

Претседателот на САД, Доналд Трамп, изјави дека Израел повеќе нема силно лоби во американскиот Конгрес што го имаше порано, оценувајќи дека ова е значајна промена на политичката сцена.
Во интервју за „Дејли Колер“, Трамп потсети дека пред две децении израелското лоби било „најсилното што некогаш го видел“, но дека денес нема такво влијание.
„Израел беше најсилно. Денес повеќе нема толку силно лоби. Неверојатно“, рече тој, додавајќи дека одредени прогресивни конгресмени, како што е Александра Окасио-Кортез, придонеле за промена на јавниот дискурс за американската поддршка за Израел.
Трамп истакна дека дури и во рамките на републиканското движење „Америка на прво место“ скептицизмот кон продолжувањето на воената помош за Израел расте. Ова го потврдуваат податоците од Универзитетот Квинипиак: 60 проценти од американските гласачи се против испраќање дополнителна воена помош, додека половина од испитаниците, вклучувајќи 77 проценти од демократите, веруваат дека Израел врши геноцид во Газа.
Од почетокот на израелската кампања во октомври 2023 година, повеќе од 63.000 Палестинци загинаа во Газа, а енклавата е опустошена и се соочува со глад. Во исто време, Меѓународниот кривичен суд издаде налози за апсење на премиерот Бенјамин Нетанјаху и поранешниот министер за одбрана Јоав Галант за воени злосторства, додека Меѓународниот суд на правдата постапува по обвиненијата за геноцид.
Фото: принтскрин