Канадскиот министер за одбрана Бил Блер денеска во Брисел, по средбата со генералниот секретар на НАТО, Марк Руте, изјави дека идејата на американскиот претседател Доналд Трамп Канада да стане 51-та држава на САД е „навредлива“, но дека тој не верува дека неговата земја е „навистина под закана“.

„Една од работите што мислам дека треба да им биде јасна на сите, вклучително и на господинот Трамп, е дека моите сограѓани Канаѓани секогаш ќе застанат во одбрана на нашата нација, за нашата земја. Подготвени сме да се браниме доколку е потребно, а тоа секогаш бара жртви“, рече Блер,  пренесува американски Политико.

Блер рече дека и верува на Америка и не е „потресен како некои“, тврдејќи дека тоа е затоа што со децении соработувал со Соединетите Држави преку низа различни администрации.

Стотици сообраќајни несреќи се забележани во американската сојузна држава Вирџинија, а десетици илјади луѓе се без струја поради обилните снежни врнежи и замрзнатиот дожд, пишува „Дејли мејл“.

Регионот на Апалачките Планини и делови од средноатлантските држави во североисточниот и југоисточниот дел на САД беа најтешко погодени.

Во меѓувреме, Калифорнија се подготвува за бура што може да ги погоди областите уништени од неодамнешните шумски пожари.

Националната метеоролошка служба извести дека во последните 24 часа во Вирџинија паднале 36,8 сантиметри снег.

Се очекуваат поплави во урбаните области во централна и јужна Калифорнија.

Поради снежното невреме кое ги зафати средноатлантските држави, на замрзнатите коловози се регистрирани голем број несреќи, а затворени се и голем број училишта. Околу 160.000 клиенти во Вирџинија и 10.000 во Северна Каролина се без струја.

Американскиот претседател Доналд Трамп изјави дека имал „долг и многу продуктивен“ телефонски разговор со рускиот претседател Владимир Путин.

Во објава на неговата платформа Truth Social, американскиот претседател вели дека разговарале за Украина и Блискиот Исток, како и за вештачката интелигенција.

Трамп додаде дека тој и Путин размислувале за фактот дека САД и Русија успешно се бореле заедно за време на Втората светска војна – и се радувал на „големите придобивки што еден ден ќе ги имаат кога ќе работат заедно“.

И двајцата се согласија, вели Трамп, дека „сакаат да запрат милиони смртни случаи во војната со Русија/Украина“.

Тој објасни дека се договориле многу тесно да соработуваат, вклучително и со посети.

Тој додаде дека се договориле нивните тимови веднаш да започнат преговори, а ќе го повикаат претседателот на Украина, Володимир Зеленски, за да го информираат за разговорот.

Трамп додава дека му наложил на тим, вклучувајќи го и државниот секретар Марко Рубио, да ги води преговорите.

„Сакам да му се заблагодарам на претседателот Путин за времето и напорот што ги вложи во овој повик, како и за вчерашното ослободување на Марк Фогел, прекрасен човек кого јас лично го поздравив синоќа во Белата куќа. Верувам дека овој напор ќе доведе до успешен заклучок, се надевам наскоро“, рече Трамп.