Свет
Хималајските глечери се топат со невидена брзина: опасност од големи поплави и недостиг на вода за пиење за 240 милиони луѓе

Глечерите во планинскиот венец на Хималаите се топат со невидена брзина што може да предизвика опасни поплави и недостиг на вода за околу 240 милиони луѓе кои живеат во планинскиот регион, покажа новиот извештај.
Глечерите во тој регион би можеле да изгубат од 75 до 80 отсто од својот волумен до 2100 година поради глобалното затоплување, се вели во извештајот.
Околу 2010 година, глечерите се топеа 65 отсто побрзо од една деценија порано, според резултатите од Меѓународниот центар за интегриран планински развој (ICIMOD) со седиште во Катманду.
„Ги губиме глечерите, ги губиме во рок од 100 години“, вели Филипус Вестер, научник и главен автор на студијата.
„Со глобалното затоплување, мразот ќе се стопи, тоа може да се предвиди. Но, она што е неочекувано и загрижувачко е брзината. Се одвива многу побрзо отколку што очекувавме“, додаде Вестер.
Со затоплување од 1,5 степени Целзиусови, или 2 степени над прединдустриските температури, глечерите низ целиот регион на Хималаите ќе изгубат од 30 до 50 отсто од својот волумен до 2100 година, се вели во извештајот.
Но, со затоплување од 3 степени Целзиусови – што ќе се случи со сегашната климатска политика – глечерите ќе изгубат 75 проценти од мразот, а на 4 степени ќе се искачи до 80 проценти.
„Тоа ја покажува потребата од итна климатска акција“, нагласи Вестер.
Извештајот покажа дека протокот на вода во 12-те речни сливови во регионот, вклучувајќи ги Ганг, Инд и Меконг, најверојатно ќе го достигне својот врв до средината на векот, со последици за повеќе од 1,6 милијарди луѓе кои зависат од тоа снабдување.
„Иако може да звучи дека ќе имаме повеќе вода бидејќи глечерите се топат со зголемена брзина…премногу често ќе има поплави наместо постојан проток“, објасни Вестер. По надоаѓањето на водата, залихите на крајот ќе се намалуваат.
Многу високопланински заедници користат глацијална вода и стопен снег за наводнување на посевите. Но, времето на снежни врнежи стана понепредвидливо и помалку од порано.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп повторно би го бомбардирал Иран ако извештаите покажат загрижувачки заклучоци за збогатување на ураниум

Претседателот на САД, Доналд Трамп, денес изјави дека апсолутно ќе го преиспита бомбардирањето на нуклеарните објекти на Иран доколку смета дека е потребно, пишува „Си-ен-ен“
„Секако, без сомнение, апсолутно“, им рече Трамп на новинарите во брифингот во Белата куќа, кога директно беше прашан дали би размислил за бомбардирање на земјата доколку идните разузнавачки извештаи покажат загрижувачки заклучоци за збогатувањето на ураниум на Иран.
Трамп рече дека не верува дека Иран би можел „повторно да влезе во нуклеарната програма во скоро време“ по нападите на САД врз неговите нуклеарни објекти минатата недела.
Администрацијата продолжи да изразува доверба во успехот на тие напади, но не понуди никакви разузнавачки податоци за да го поткрепи тврдењето на Трамп дека нуклеарната програма на Иран е, според неговите зборови, уништена.
„Може ли да ви кажам – тие се исцрпени. И Израел е исто така исцрпен. Разговарав со едната и со другата земја, и двете сакаа тоа да се реши – и двете – и ние направивме одлична работа. Но, тие се исцрпени. Последното нешто за кое размислуваат во моментов е нуклеарното оружје. Знаете за што размислуваат? Тие размислуваат за утре, за тоа како да преживеат“, рече американскиот претседател.
Свет
Велика Британија почна да ги одбива украинските бегалци: „Можете да одите во безбеден дел од Украина“

Обединетото Кралство почна да ги одбива барањата за азил од Украинците, тврдејќи дека апликантите можат безбедно да се преселат во други делови од Украина, соопшти „Гардијан“.
Адвокатска фирма со седиште во Лондон изјави за „Гардијан“ дека добива неделни барања од Украинци во чии писма за одбивање често стои дека не ги исполнуваат условите за прогон според Конвенцијата за бегалци, бидејќи се смета дека можат да се преселат во побезбедни делови од Украина.
Во писмата, исто така, се споменува достапноста на јавни услуги во Украина и се предлага да се побара помош од Високиот комесаријат на ОН за бегалци (УНХЦР) и локалните организации.
Компанијата забележува дека зголемувањето на одбивањата е поврзано со промените во упатствата на Министерството за внатрешни работи на Велика Британија во јануари, кои сега ги сметаат регионите како Киев и западна Украина за „генерално безбедни“.
Статусот на бегалец во Велика Британија им дава на примателите пет години престој со право на работа, социјална помош, здравствено осигурување, помош за домување и семејно обединување.
Велика Британија, исто така, нуди привремени визи преку програмите „Домови за Украина“ и „Украинско семејство“, кои овозможуваат престој до 18 месеци. До март 2025 година, беа издадени повеќе од 270.000 визи.
Околу 4,3 милиони Украинци добија привремена заштита во ЕУ
Портпарол на Министерството за внатрешни работи изјави за Гардијан дека Велика Британија понудила или продолжила заштита на повеќе од 300.000 Украинци откако започна конфликтот во февруари 2022 година. Министерството за внатрешни работи нагласи дека барањата за азил се оценуваат од случај до случај и дека шемата „Домови за Украина“ останува отворена.
Неколку милиони Украинци ја напуштиле земјата во последните три години. Според податоците на Евростат, околу 4,3 милиони добиле привремена заштита во ЕУ до март 2025 година.
Лондон ѝ вети на Украина милијарди воена помош од 2022 година.
Свет
Путин: Подготвен сум да се сретнам со Трамп, го почитувам

Рускиот претседател Владимир Путин изјави дека односите меѓу Русија и Соединетите Американски Држави почнуваат да се стабилизираат, што го припиша на напорите на американскиот претседател Доналд Трамп.
Путин повтори дека има голема почит кон Трамп и дека е подготвен да се сретне со него. Иако таквата средба би барала внимателна подготовка, Путин рече дека тоа е „целосно можно“.
„Општо земено, благодарение на претседателот Трамп, односите меѓу Русија и Соединетите Американски Држави почнуваат да се враќаат во рамнотежа на некој начин“, рече Путин на прес-конференција во Минск.
„Не е сè одлучено во сферата на дипломатските односи, но првите чекори се преземени и ние напредуваме“, додаде тој.