Свет
„Хитроу“ го ограничи бројот на патници поради секојдневниот хаос

Лондонскиот аеродром „Хитроу“ објави дека ќе го ограничи бројот на патници што заминуваат на 100.000 дневно за да се избегне метеж бидејќи се бори со зголемената побарувачка и да спречи понатамошни откажувања летови. Авиокомпаниите на најголемиот британски аеродром веќе го прифатија повикот на владата за намалување на капацитетот, но „Хитроу“ рече дека мора да се направи повеќе.
Аеродромот вели дека авиокомпаниите, ракувањето со багажот и другите копнени услуги може да издржат до 100.000 патници кои заминуваат дневно, бројка што редовно се надминува во последните недели, што доведува до неприфатливо лоша услуга.
„Некои авиокомпании презедоа значајни чекори, а други не и веруваме дека се потребни дополнителни мерки за да се обезбеди патниците да патуваат безбедно и сигурно“, рече директорот на „Хитроу“, Џон Холанд-Кеј, во отвореното писмо до патниците.
„Затоа ја донесовме тешката одлука да го ограничиме капацитетот од 12 јули до 11 септември“, додаде тој.
Во понеделникот „Хитроу“ во последен момент одлучи да откаже десетици летови што требаше да превезуваат околу 10.000 патници. Откажани се 61 лет бидејќи аеродромот во западен Лондон не можеше да се справи со бројот на патници. Бројот на патници што летале од „Хитроу“ во првата половина од годината бил 26 милиони, шест пати повеќе отколку во истиот период во 2021 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Србија ќе се приклучи на развојот на руската вакцина против рак

Претседателот на Србија, Александар Вучиќ, изјави дека разговарал со Александар Кецман, директор на Институтот „Гамалеја“ во Москва, кој го информирал дека во Русија се развива вакцина против рак.
„Ми објаснија одредени работи. Имаме голем процент на заболени од рак. Оваа вакцина е поинаква, бидејќи им помага на веќе болните луѓе — не е превентивна. Може да биде успешна до 85 проценти,“ рече Вучиќ.
Тој додаде дека Србија ќе се вклучи во проектот веднаш штом Русија го дозволи тоа:
„Ќе подготвиме целосна инфраструктура за да бидеме спремни за два до три месеци. Не можеме уште да ја произведуваме, но ќе направиме сè за да бидеме подготвени.“
Вучиќ нагласи дека во Србија има повеќе случаи на малигни заболувања отколку во другите земји, што, според него, е поврзано со последиците од бомбардирањето во 1999 година.
Свет
Ројтерс: Зеленски ќе му презентира на Трамп план за користење на ракетите „Томахавк“

Украинскиот претседател Володимир Зеленски подготвува презентација за Доналд Трамп во која ќе објасни како Украина би ги користела крстосувачките ракети „Томахавк“ доколку САД одобрат нивна испорака, објави Ројтерс повикувајќи се на висок извор.
Според агенцијата, Киев смета дека овие ракети со домет од над 1.600 километри би можеле да го променат текот на војната, овозможувајќи напади врз цели длабоко во Русија, вклучувајќи енергетски постројки и воени бази.
Сепак, не е извесно дали Трамп ќе ја прифати украинската аргументација. Тој вчера изјави дека на САД им се потребни сопствените залихи на „Томахавк“ и изрази загриженост поради нивното исцрпување.
Свет
Орбан и Путин разговарале за можниот самит со Трамп во Будимпешта

Унгарскиот премиер Виктор Орбан телефонски разговарал со рускиот претседател Владимир Путин за планираниот состанок меѓу Путин и американскиот претседател Доналд Трамп во Будимпешта, соопшти Кремљ. Според соопштението, иницијативата за разговорот дошла од унгарската страна.
„Орбан ја изрази подготвеноста да помогне во организирањето на можниот руско-американски самит во Будимпешта“, се наведува во соопштението на Кремљ.
Путин го информирал Орбан за неговиот неодамнешен телефонски разговор со Трамп и изјавил дека планираниот состанок ќе го искористи за дискусија околу „алгоритамот на понатамошни чекори“ со цел пронаоѓање начин за завршување на војната во Украина.
По разговорот, Орбан на социјалните мрежи напиша дека „подготовките се во полн ек“, очигледно алудирајќи на можниот самит во унгарската престолнина.
Трамп и Путин разговарале вчера, првпат по речиси два месеца. Американскиот претседател потоа најави дека планира состанок со рускиот лидер во Будимпешта — што би билa првa неговa посетa на главен град на земја членка на ЕУ од почетокот на инвазијата врз Украина.
Трамп изјави дека Путин не ја поддржува идејата САД да ѝ испорачаат на Украина ракети „Томахaвк“ и додаде дека „можеби сега не е совршен момент“ за воведување дополнителни санкции насочени кон руските енергетски приходи.