Свет
Ходорковски: Инвазијата на Украина ќе придонесе за пад на режимот на Путин за пет години
Промената на власта во Русија ќе се случи во рок од пет години, а инвазијата на Украина ќе придонесе за пад на режимот на рускиот претседател Владимир Путин, изјави рускиот бизнисмен и опозиционер, Михаил Ходорковски во интервју за францускиот весник „Фигаро“.
„Кремљ се обиде да го убеди целиот свет дека Путин излезе посилен од бунтот на платеничката група Вагнер . Сепак, знаеме дека тоа не е така. Населението е далеку од активна поддршка на режимот. Понекогаш ги примаше луѓето на Вагнер многу позитивно за време на нивниот обид да напредуваат кон Москва, а лојалноста на армијата беше далеку од идеална“, рече Ходорковски, кој живее во егзил во Велика Британија.
Според него, Путин е решен да оди до крај и своите политички тешкотии секогаш ќе ги решава со војни.
„Тој не може да го промени својот метод. Проблемот е што во западните земји повеќе нема политички лидери, туку само политички претставници. Во воената ситуација која денес ја доживува Европа, потребен е лидер кој ќе може да му објасни на својот народ дека мора радикално да го промени својот менталитет. Таква структура имаа Винстон Черчил, Хелмут Кол и Вили Брант“, вели поранешниот шеф на нафтената компанија „Јукос“.
Ходорковски додава дека е загрижен за русофобијата, која, како што изјави, не ја забележал во Соединетите Американски Држави, туку во Европа.
Тој оцени дека ова му служи само на Путин, кој може да каже дека цел руски народ е нападнат, а не само неговиот режим.
„Ако Западот престане да и помага на Украина, а Путин успее да окупира значителен дел од територијата на Украина, па дури и цела Украина, тој нема да добие огромен политички или економски капитал. Борбите на украинска територија ќе продолжат и санкциите ќе останат во сила“, смета Ходорковски.
Како што истакнува, Русија поради тоа ќе доживее минимален економски раст, па дури и рецесија, а Путин ќе се најде во ситуација кога ќе мора да започне нова војна за да остане на власт.
„Во најдоброто сценарио за НАТО, оваа нова војна ќе започне во западна Украина. Во најлош случај, тие ќе дивеат на територија на земја на НАТО“, рече Ходорковски.
Според него, само промената на режимот во Кремљ ќе им овозможи на Украинците да ја вратат својата територија и да ги вратат државните граници од 1991 година.
„Но, на крајот, овие две можности се целосно испреплетени. Ова се две страни на иста монета. Убеден сум и дека во следните пет години ќе има промена на режимот во Русија“, изјави рускиот опозиционер.
Според Ходорковски, проблемот е што во интерес на денешните руски олигарси е да го задржат Путин на власт, пренесува Танјуг.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Ердоган помилува седуммина поранешни високи воени офицери за соборување на владата во 1997 година
Претседателот на Турција, Реџеп Таип Ердоган, денеска помилува седуммина поранешни високи воени офицери, кои беа осудени на доживотен затвор за соборување на владата во 1997 година.
Поранешните генерали, кои се во доцните 70-ти и 80-ти години, беа помилувани поради здравствени проблеми и старост, според одлуката објавена во „Службениот весник“ на земјата во текот на ноќта, пренесе АП.
Судот ги осуди генералите на доживотен затвор во 2018 година за нивната улога во кампањата предводена од просекуларната армија на Турција, која принуди на оставка на тогашниот премиер Нејметин Ербакан.
Свет
Зеленски потпиша закон кој им дозволува на затворениците да одат на фронтот
Украинскиот претседател Володимир Зеленски го потпиша законот за мобилизација, кој, меѓу другото, предвидува некои категории осуденици да може да служат војска.
Според документот, затворениците ќе може да се мобилизираат во армијата за договорна служба и ќе бидат пуштени на условна слобода. Според министерот за правда, во Украина има околу 10-20.000 осуденици, кои можеби во иднина ќе бидат мобилизирани и ќе служат во специјалните единици, пренесува „РБК Украина“.
Заменик-министерката за правда Елена Височка изјави дека пред да се усвои законот речиси 4.000 илјади затвореници се согласиле да одат на фронт во замена за условно ослободување во истражувањето спроведено во април. Истовремено, одбиени се околу 4.000 осуденици со дијагностицирани заразни болести, како ХИВ, хепатитис и туберкулоза.
Како што е наведено од Министерството за правда, од 15 мај 2024 година во украинските затвори има 27.471 осуденик, меѓу кои 1.538 жени. Заменик-министерот за правда додаде дека за законско функционирање потребно е носење подзаконски акти. Според неа, за неколку недели законот ќе биде целосно имплементиран.
Зеленски денеска потпиша и посебен закон за зајакнување на одговорноста за воени прекршоци, со кој се зголемуваат казните за оние што не ги почитуваат правилата за мобилизација.
Свет
Земјите од ЕУ повикаа на преоценување на ситуацијата во Сирија поради враќањето на мигрантите
Владите на осум земји членки на Европската Унија денеска соопштија дека е потребна преоцена на ситуацијата во Сирија за да се овозможи доброволно враќање на сириските бегалци во нивната татковина.
Во заедничката декларација официјални лица од Австрија, Чешка, Кипар, Данска, Грција, Италија, Малта и од Полска рекоа дека се согласиле за повторна процена, што ќе доведе до поефективни начини за справување со сириските бегалци, кои се обидуваат да стигнат до земјите на Европската Унија бидејќи ситуацијата во Сирија значително се промени, иако не е постигната целосна политичка стабилност, пренесува АП.
Во декларацијата се наведува дека ЕУ треба дополнително да ја зголеми својата поддршка за Либан со цел „да се намали ризикот од уште поголем прилив на мигранти од Либан во ЕУ“ откако претходно овој месец ЕУ објави пакет-помош за Либан во вредност од околу една милијарда евра со цел зајакнување на граничните контроли за да се запре приливот на баратели на азил и мигранти кон Кипар и Италија.