Свет
Холандскиот премиер ги забрани мобилните телефони на владини состаноци, сака да спречи прислушување

Новиот холандски премиер Дик Шуф ги забрани мобилните телефони на неделните состаноци на владата, со цел да се намали ризикот од дигитално прислушување.
„Заканата од шпионажа е безвременска. Електронски уреди, телефони, iPad, сите тие се мали микрофони, а странските земји се заинтересирани за донесените одлуки во Холандија и ние сакаме да го спречиме тоа. Тоа е многу едноставна мерка, сите телефони одат во сеф“, изјави Шуф.
Телефоните не беа забранети за време на неговиот претходник, Марк Руте, кој ја напушти холандската политика по општите избори во ноември.
Шуф, чија технократска влада ја презеде функцијата во јули, рече дека има поинаков пристап врз основа на неговата претходна работа како шеф на разузнавањето.
„Можеби имам малку повеќе искуство со такви работи. За мене тоа беше сосема природна мерка. Сите членови на кабинетот веднаш се согласија“, додаде премиерот.
Ерик Акербум, актуелниот шеф на службата за разузнавање и безбедност, минатата година предупреди за шпионажа, спомнувајќи дека Кина е насочена кон Холандија, особено нејзиниот високотехнолошки сектор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Фото) „Постапките на Трамп убиваат, а љубовта спасува животи“, кажаа на Парадата на гордоста во Амстердам

Околу 80 шарени бродови за Парадата на гордоста пловеа низ каналите на Амстердам на крајот од седумдневната прослава на ЛГБТК+ заедницата во градот.
Иако поворката не е политичка, учесниците ја искористија можноста да ги критикуваат конфликтите што беснеат низ целиот свет и бројните светски лидери за нивните негативни ставови кон правата на ЛГБТК + заедницата, пренесува Ројтерс.
Палестински знамиња беа видени и во толпата, а холандската полиција уапси четворица активисти кои скокнаа во водата и оштетија брод на Букинг во знак на протест против тоа што им беше понуден сместување во населбите окупирани од Израел.
Учесниците на парадата го критикуваа и американскиот претседател Доналд Трамп, чија администрација спроведе антитранс политики и ги намали средствата за меѓународни програми за помош, што ги загрози напорите за превенција од ХИВ во Африка.
На еден од бродовите беа прикажани лажни гробишта и порака „Постапките на Трамп убиваат. Љубовта спасува животи“.
Свет
(Видео) МААЕ: Експлозии и чад во близина на нуклеарната централа Запорожје

Меѓународната агенција за атомска енергија (МААЕ) денес објави дека нејзиниот тим во нуклеарната централа Запорожје во Украина слушнал експлозии и видел чад што доаѓа од блиската локација.
Нуклеарната централа објави дека еден од нејзините помошни објекти бил нападнат денес, според соопштението, објави Ројтерс.
Се нагласува дека помошниот објект се наоѓа на 1.200 метри од нуклеарната централа.
Претставниците на електраната претходно денес објавија дека гранатирањето од страна на украинските вооружени сили предизвикало локализиран пожар во индустриската зона во близина на нуклеарната централа Запорожје.
🔴 UKRAINE :📹 AN AUXILIARY FACILITY OF UKRAINE'S ZAPORIZHZHIA NUCLEAR POWER PLANT (ZNPP) WAS HIT
ZNPP is Europe's largest nuclear plant, under Russian control since 2022
The IAEA reported its team at Zaporizhzhia Nuclear Power Plant heard… pic.twitter.com/MSeeXGYnlh
— LW World News 🌍 (@LW_WorldNews) August 2, 2025
Како што е соопштено, нема закана за безбедното работење на нуклеарната централа.
Се наведува дека зрачењето измерено во индустрискиот комплекс на електраната и во зоната на набљудување било „во границите на природните вредности“.
Во соопштението стои дека за време на гаснењето на пожарот, рускиот спасувачки тим бил нападнат од дрон на украинските вооружени сили и дека во нападот немало жртви.
Свет
Хамас: Разоружување само ако има независна палестинска држава

Палестинската милитантна група Хамас изјави дека нема да го положи оружјето сè додека не се воспостави независна палестинска држава.
Во соопштението, Хамас наведува дека не може да се откаже од вооружениот отпор сè додека не се воспостави целосно враќање на палестинските национални права, од кои најважно е воспоставувањето независна, целосно суверена палестинска држава со Ерусалим како главен град, пренесува Ројтерс.
Индиректните преговори меѓу Хамас и Израел, со цел постигнување 60-дневно примирје во војната во Газа и договор за ослободување на заложниците, минатата недела дојдоа во ќорсокак откако делегациите на САД и Израел се повлекоа од разговорите во Доха, Катар.
Во тоа време, американскиот специјален претставник Стив Виткоф го обвини Хамас дека преговара без вистинска желба за договор.