Регион
Хрватскиот крал на крадците има 700 кривични пријави
Маријан Пухало е хрватски крал на крадците – тој има зад себе 700 кривични пријави и од својата 15-та година е чест гостин на затворите. Приказната за 57-годишниот Хрват повторно се најде на насловните страници на медиумите во регионот, откако полицијата го фати за последната кражба – се обидел сред бел ден да одземе вредна опрема од канцелариите на редакцијата на „Канал Ри“ во Риека. Фатен е само неколку месеци откако излегол од затвор.
„Тој дојде од затвор дома на 7 март. Не издржа ниту четири месеци, а да не украде нешто. Дали е ова нормално за вас?”, коментираат сестрата и мајката на неславниот рекордер по кражби.
Според зборовите на членовите на неговото семејство, тој 42 години поминал по затвори, а почнал да краде како малолетник. На почетокот на март го напуштил затвор откако отслужил 15 години затвор, поради повеќе кривични дела. Зад решетки повторно завршил во саботата, поради кражба на вредната опрема од „Каналот Ри“ во Риека.
„Никогаш порано не сме имале таков случај. Значи, човекот лежерно влегол во редакцијата сред пладне во 10:35 часот.Во просториите имало луѓе, како и во собата на снимателот, каде постојано некој влегувал и излегувал. Но и тоа не го попречило. Од масата на која се наоѓал ранец со опрема за јавување во живо вредна 100.000 куни, ги украл вредните предмети и мобилен телефон”, вели Игор Ривети, уредник на „Каналот Ри“.
Снимките покажуваат дека Пухало, облечен во фармерки и бледожолта кошула, со чанта околу појасот, ја отвора вратата и влегува во редакцијата. Од снимките изгледа дека тој не е свесен дека има камери за надгледување кои го следеле секое негово движење. Благодарение на снимките и материјални траги што останале на местото на настанот, полицијата во Риека го идентификуваше сторителот наредниот ден. Тие беше пронајден во Пула.
Не се знае точниот број на кривични пријави поднесени против Пухало, но медиумите наведуваат дека станува збор за над 700.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Додик не го признава геноцидот во Сребреница: „Ќе однесеме цвеќе, ако не навредува никого“
Во четвртокот, лидерот на Србија во Босна и Херцеговина, Милорад Додик, изрази подготвеност да го посети Меморијалниот центар Поточари во Сребреница и да положи цвеќе на заедничкиот споменик подигнат во спомен на масакрот на Бошњаците за време на војната, но тој повторно негираше дека таму имало геноцид.
Во интервју за новинската агенција на Република Српска, претседателот Додик најави дека владата и целото раководство на овој ентитет ќе заседаваат во Сребреница на 2 мај 2024 година, кога ќе се одржи дискусија пред Обединетите нации и се очекува гласање за Резолуција за осуда на геноцидот во тој град во летото 1995 година.
Резолуцијата е поддржана од дваесет земји, меѓу кои САД, Обединетото Кралство и Германија и се очекува нејзино усвојување. Целта е да се интернационализираат страдањата на Бошњаците во Сребреница.
Водечките српски претставници од Белград и Бања Лука, претседателите Александар Вучиќ и Милорад Додик, тврдат дека ова е обид да се префрли вината на српскиот народ.
„Република Српска нема да ја прифати резолуцијата за Сребреница за која ќе се одлучува во Генералното собрание на ОН бидејќи се што е напишано во неа е лага. Босна и Херцеговина не може да живее врз основа на тоа дека едната нација во неа е оквалификувана како геноцидна“, рече Додик.
Сепак, тој изрази подготвеност да им оддаде почит на жртвите од масакрот во Сребреница.
„Ако ни се укаже можност, на 2 мај ќе однесеме венци во Поточари, ако тоа не навреди никого. Не се плашам дека би можел да завршам како Вучиќ, кој дојде да им оддаде почит на жртвите, изрази сочувство, а доби камен во главата и никој не одговараше за тоа“, истакна Додик.
Тој смета дека Резолуцијата за Сребреница сепак нема да го добие потребното мнозинство на седницата на Генералното собрание на ОН.
Регион
Двајцата осомничени за убиството на малата Данка испратени во Специјалната затворска болница
Двајцата осомничени Срѓан Јанковиќ и Дејан Драгијевиќ денеска се испратени во Специјалната затворска болница во Белград на психијатриско вештачење, пишува „Телеграф“.
Во написот медиумот пишува дека осомничениот Дејан Драгијевиќ (50) деталите за убиството на детето ги изнесе во Вишото јавно обвинителство во Заечар. Сепак, тој не сакаше да открие каде го оставил телото на Данка.
Срѓан Јанковиќ (50) не зборувал за делото.
Во Вишото јавно обвинителство во Заечар биле сослушани и родителите на Данка, Ивана и Милош, кои, како што се наведува, опишале како течел денот кога исчезнала ќерка им.
Додека давале исказ, во иста просторија седеле и осомничените за убиството на детето.
Пред рочиштето исказ за „Телеграф“ дал таткото на убиената Данка.
„Смртната казна не им е доволна, треба да бидат во затвор до крајот на животот. Тоа се чудовишта, она што постојано го доживуваме не се опишува. Тоа може да го разбере само родител. Неколкупати ни дојде полиција, ѝ зедоа разни работи на Данка, ништо не знаеме, ниту за крвта на патот ниту во автомоблилот, ништо. Не ни е јасно зошто не се јавиле во итната помош, зошто не помогнале, но го направиле ова што го направиле. Тоа што јас и Ивана постојано страдаме е страшно, разни луѓе ни се јавуваат, нѐ навредуваат, ни ја префрлаат вината. Морав да побарам да го сменам бројот, не можеме повеќе. Кога сѐ ќе заврши, ќе кажеме сѐ“, рече тој.
Регион
Воз налета на пешак: трагедија кај Стара Пазова
Вечерва околу 19:15 часот брз воз налетал на пешак на брзата пруга Нови Сад-Белград.
Несреќата се случила меѓу станиците Инѓија и Стара Пазова.
Засега не се знае точно како дошло до несреќата, а полицијата врши увид на лице место.
Информирани се сите надлежни служби, пишуваат српските медиуми.