Свет
„Хјуман рајтс воч“: Израел користеше бел фосфор во нападите врз Газа и Либан
„Хјуман рајтс воч“ го обвини Израел за употреба на муниција со бел фосфор во воените операции во Газа и Либан велејќи дека употребата на такво оружје ги става цивилите во ризик од сериозни и долгорочни повреди.
Запрашана да ги коментира наводите, израелската војска рече дека „во моментот не знае за употребата на оружје што содржи бел фосфор во Газа“. Тие не ги коментираа тврдењата за употреба во Либан, пренесува „Ројтерс“.
Израел ја бомбардира Газа како одмазда за дивеењето на Хамас во јужните израелски градови, во кое загинаа најмалку 1.300 луѓе. Најмалку 1.500 Палестинци беа убиени во Газа, а цел на Израел беше и либанскиот Хезболах.
„Хјуман рајтс воч“ соопшти дека ја провериле видеоснимката направена во Либан на 10 октомври и во Газа на 11 октомври, кои, како што вели, покажуваат „повеќе воздушни напади на артилерија од бел фосфор лансирани над пристаништето во градот Газа и две рурални локации по должината на израелско-либанската граница“.
Тие објавија и линкови до две видеа објавени на социјалните мрежи за кои тврдат дека покажуваат „употреба на артилериски гранати од бел фосфор од 155 мм, очигледно за димни завеси, означување или сигнализација“. И двете наводно прикажуваат област во близина на израелско-либанската граница.
Организацијата не објави линкови до видеа, кои ја покажуваат нивната употреба во Газа. Палестинските ТВ-канали прикажаа видео на кое се гледаат тенки облаци од бел чад на небото над Газа, наводно предизвикани од фосфорна муниција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Руски беспилотни летала гаѓаа украинска енергетска инфраструктура, делови од земјата без електрична енергија
Руски беспилотни летала погодија електрани рано утринава, прекинувајќи ја струјата во некои делови од областа Суми во северна Украина, соопштија властите.
Во објава на комуникациската платформа Телеграм, регионалните власти соопштија дека беспилотните летала ги погодиле градовите Шостка и Конотоп, североисточно од Киев и во близина на границата со Русија. Воздухопловните сили на Украина соборија седум беспилотни летала користени во нападот, соопштија регионалните власти.
Украинската војска соопшти дека соборила 24 беспилотни летала лансирани од Русија во напад во текот на ноќта врз пет други региони на југот и на истокот на земјата.
Службите за итни случаи работат на враќање на струјата во три окрузи.
Пред нешто повеќе од една недела, руските сили ја преминаа границата и почнаа да навлегуваат во североисточниот регион Харков, а властите предупредија на трупање војници и можен напад врз соседниот регион Суми.
Европа
Норвешка ја призна палестинската држава
Владата на Норвешка денеска соопшти дека нордиската земја признава независна палестинска држава.
Норвешкиот премиер Јонас Гар Стор денеска изјави дека скандинавската земја донела одлука официјално да ја признае Палестина како држава.
Одлуката стапува на сила на 28 мај, објави АП.
„Не може да има мир на Блискиот Исток доколку не дојде до признавање“, рече норвешкиот премиер, додавајќи дека „Палестина има основно право на независна држава“.
Неколку земји од Европската унија во последните недели дадоа индикации дека планираат да ја признаат Палестина, бидејќи сметаат дека решението со две држави е клучно за траен мир во тој регион.
Норвешка, која не е членка на Европската унија, но најмногу ги следи одлуките на Брисел, долго време го поддржува решението со две држави, Израел и Палестина.
Свет
Три земји денеска ќе го објават официјалното признавање на државата Палестина
Три земји денеска, како што е најавено, ќе го објават признавањето на палестинската држава, пренесува Гардијан.
Ирска, Шпанија и Норвешка се очекува да ги објават плановите за формално признавање на палестинската држава поради израелските предупредувања дека признавањето „ќе го поттикне екстремизмот и нестабилноста“.
Тројцата лидери на ирската влада – премиерот Сајмон Харис, вицепремиерот Мајкл Мартин и министерот Имон Рајан, претпладнево треба да одржат прес-конференција. Тие претходно посочија дека владата ќе направи чекор кон признавање на палестинската државност до крајот на мај.
Националната јавна радиодифузија РТЕ и Ирш Тајмс објавија дека се очекува одлуката да биде објавена на прес-конференција.
„Гардијан“ пишува дека и шпанскиот премиер Педро Санчез денеска ќе открие датум за формално признавање, откако минатата недела ја објави својата намера да го стори тоа.
Санчез беше еден од најискрените европски лидери кога се работеше за критикување на израелската офанзива во Газа.
Норвешкиот јавен сервис и дневниот весник Афтенпостен во меѓувреме објавија, повикувајќи се на неименувани извори, дека владата денеска ќе објави дека нордиската земја признава независна палестинска држава.