Патиштата во јужна Германија беа покриени со мраз. Само во покраината Баден-Виртемберг на југозападот на земјата се регистрирани повеќе од 260 сообраќајни несреќи, во кои две лица загинаа, а неколку се повредени.

Поради мразот, летовите од аеродромот во Штутгарт мораа да се пренасочат, а училиштата беа затворени на некои места.

Има исклучително тенок слој мраз низ кој се гледа асфалтот, а возачите тешко го забележуваат поради што го нарекуваат и црн мраз. Германската полиција предупредува на замрзнати патишта и ги советува возачите да возат бавно и предвидливо и да не запираат нагло.

Најмалку две лица загинаа утрово во Баварија. Еден човек загина кога неговиот автомобил се судри со камион на А92 во јужна Баварија, а друга смртност беше пријавена на А3 во близина на Регенсбург.

Неколку делови од автопатиштата се затворени поради временските услови, пренесува Tagesschau. Според „Дојче бан“, нема прекини во железничкиот сообраќај.

Наставата е откажана во некои училишта во Баварија, а во Саксонија на пешаците, велосипедистите и на возачите им се советува да бидат внимателни и доколку е можно да ги избегнуваат главните патишта.

Утринава, ледените услови го парализираа авиосообраќајот на аеродромот во Штутгарт, каде што мораа да ја исчистат пистата. Имаше и големи доцнења. Причина се опасните временски услови, кои веќе неколку дена доаѓаат од север и носат дожд и студ.