Свет
Шефот на FBI тврди дека Русите влегле но не ја хакирале кампањата на Трамп

Руските информатички хакери кои наводно се обидувале да се уфрлат во американските претседателски избори не го хакирале тимот на националната кампања на сега избраниот претседател Доналд Трамп, изјави во вторникот директорот на американското Федерално биро за истраги (FBI), Џејмс Коми во продолжението од сослушувањето пред комисијата за разузнавање на Сенатот, откако претходно призна дека Бирото во истрагата за кибернетичките напади немало директен пристап до серверите на хакираната Демократска партија, и оти податоците ги добиле од „реномирана приватна компанија“.
Пред сенатската комисија, челникот на FBI, Џејмс Коми, тврдеше дека Русите упаднале во компјутерскиот систем на кампањата на Доналд Трамп на локално и на ниво на сојузни државни, но не и на национално ниво.
„Немаме никакви податоци дека кампањата на Трамп била хакирана на национално ниво. Русите дошле до податоци на Републиканската партија, но станувало збор за адреси од електронска пошта кои повеќе не биле во употреба“, појасни Коми додавајќи дека „собраните информации биле работа на минатото и не ги објавиле“.
Откако американското разузнавање го објави извештајот за кибернетичките упади во мрежите на Демократската партија во кој го обвинува директно рускиот државен врв, повеќе републиканци изјавија дека демократите имаат вина затоа што не сториле ништо да ги заштитат.
Администрацијата на американскиот претседател Барак Обама, кој ја поддржуваше во кампањата својата поранешна државна секретарка Хилари Клинтон која беше поразена од републиканскиот кандидат Доналд Трмап, ја обвинува Москва дека водела кампања на „поткопување на американскиот демократски процес“ за победа на Трамп.
САД особено ја обвинуваат Русија дека нејзиното воено разузнавање ГРУ ја хакирало електронската пошта на Националниот комитет на Демократската партија (DNC) и на Џон Подеста, шефот на кампањата на Клинтон, кои му ги доставиле на WikiLeaks. Овие подоцна објавени преписки го дискредитираа демократите во однос на заговор против сенаторот Берни Сандерс кој беше кандидат на предизборите и бизнис односите на Подеста и предизвикаа серија оставки во DNC.
Џулијан Асанж, основачот на WikiLeaks во онлајн прес-конференција решително негираше дека податоците ги добивале од некоја влада или служба, вклучително и руската.
Во вторникот портпаролот на Кремљ, Дмитриј Песков, коментирајќи ги американските обвиненија за наводното хакирање и воведените санкции оцени дека станува збор за „лов на вештерки“. Марија Захарова, портпаролката на руската дипломатија, пак, порача дека „изгледа дека Русите хакирале само две работи, а тоа се мозокот на Обама и извештајот за руските хакери“.
Сепак Вашингтон се реши на санкции со протерување на 35 руски дипломати и воведување санкции против девет физички и правни лица, а се заканува со нови и со одмазда.
Доналд Трамп, кој долго беше скептичен во врска со американските разузнавачки служби, откако беше запознаен со извештајот, повеќе не ги критикува директно./кај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Завршени обдукциите на четворицата државјани на Малта кои загинаа во сообраќајна несреќа во Хрватска

Давењето е најверојатната причина за смртта на двата брачни пара од Малта кои загинаа минатиот четврток во тешка сообраќајна несреќа во Буница кај Сењ, Хрватска, кога нивниот автомобил излеѕа од Јадранската магистрала во морето.
Ова го открија прелиминарните резултати од обдукцијата спроведена во Риечкиот институт за судска медицина и криминалистика, пишува риечкиот портал Бурин.
Иако лабораториските тестови сè уште се во тек, давењето се смета за најверојатна причина за смртта. Починатиот Џереми Гамбин (68), неговата сопруга Лорејн (67), Кевин Боничи (67) и неговата сопруга Александра (66) претрпеле само полесни повреди кои не можат да се поврзат со смртта.
Се верува дека сите носеле безбедносни појаси кога нивниот „ленд ровер дискавери“ излетал клисурата, а потоа и во морето.
Веднаш по несреќата, се сомневаше дека на возачот му се слошило, поради што ја изгубил контролата врз возилото на малата кривина. Сепак, обдукцијата не ја потврдила оваа шпекулација, објавија хрватските медиуми.
Утврдено е дека сите жртви имале здрави срца, без претходни срцеви удари или други здравствени проблеми што би можеле да ја предизвикаат несреќата.
Останува нејасно зошто возачот, за кој се верува дека е Кевин Боничи, ја изгубил контролата врз возилото. Тој бил пронајден во скутот на патникот Џереми Гамбино, додека нивните сопруги биле на задното седиште.
Трагедијата покрена голем број прашања, првенствено зошто патниците не можеле да излезат од автомобилот, кој потонал на длабочина од 11 до 12 метри.
Никој од нив не претрпел повреди што би предизвикале губење на свеста, но вратите од смачканото возило не можеле да се отворат.
Автомобилот, кој мажот од Малта го изнајмил на аеродромот во Загреб, бил извлечен од морето минатиот петок. Нуркачи и камион за влечење учествувале во операцијата.
Полицискиот службеник Јасмин Мујаковиќ, кој прв пристигнал на местото на настанот, скокнал во морето и нуркал неколку пати, но безуспешно се обидел да ја отвори вратата. Телото на една жена исплутало од возилото, додека другите три жртви биле пронајдени во автомобилот.
фото: принтскрин
Свет
Преговарачот на Хамас потврди: Со Израел разменети списоци на затвореници и заложници

Висок функционер на Хамас, Тахер Ал-Нуну, денес изјави дека преговарачите од неговата организација и Израел размениле списоци на затвореници и заложници кои би биле ослободени доколку се постигне договор за време на тековните преговори за прекин на огнот во Газа што се одржуваат во Египет.
Ал-Нуну, исто така, рече дека Хамас изразил оптимизам за постигнување договор, наведувајќи дека групата покажала потребна позитивност, објавува Ројтерс.
Порано денес, египетскиот министер за надворешни работи, Бадр Абдел Аати, зборуваше и потврди дека разговорите меѓу делегациите на Хамас и Израел се одржуваат во Шарм ел Шеик. Тој рече дека арапските земји ќе ги поддржат мировните договори со Израел доколку конфликтот заврши, објави агенцијата Ал Арабија претходно денес.
Шефот на египетската дипломатија потсети дека американскиот план предвидува крај на војната, отфрлање на анексијата и раселувањето, заедно со потребата од заеднички меѓународни напори за безбедно враќање на израелските сили од Појасот Газа.
Фото: принтскрин
Свет
Грета Тунберг: Израелците ставија 60 луѓе во кафези и рекоа дека ќе нè убијат со гас

Шведската активистка Грета Тунберг изјави дека нејзе и на другите притворени активисти од флотилата за Газа им бил одбиен пристап до чиста вода додека биле во израелски притвор и дека како резултат на тоа се разболеле.
Тунберг беше меѓу деветте шведски активистки приведени минатата недела откако Глобалната флотила Сумуд, која се обидуваше да достави хуманитарна помош во Појасот Газа, беше пресретната од израелската војска.
Приведените активисти се вратија во Шведска. Зборувајќи на прес-конференцијата одржана на плоштадот Сергелс Торг во Стокхолм со други активисти, Тунберг нагласи: „Им кажавме на луѓето што дојдоа од шведскиот конзулат дека немавме пристап до чиста вода за пиење за време на нашиот притвор, бидејќи водата беше контаминирана и се разболевме“.
Наведувајќи дека побарале помош од конзуларните службеници бидејќи водата од чешма била валкана, таа додаде: „Тие (Израелците) фрлаа шишиња полни со вода за пиење пред нас и ни се смееја што баравме чиста вода. Им рековме: ‘Нема да си одиме додека не добиеме пристап до чиста вода за пиење.’“
Тунберг истакна дека ги пријавиле своите поплаки кај шведските конзуларни службеници. „Кога конзуларните службеници си заминуваа по средбата со нас, им реков: ‘Кога ќе си одите, ќе нè претепаат, бидејќи никој нема да гледа.’ Шведските службеници сепак си заминаа“, рече таа.
Таа тврди дека биле подложени на физичка тортура. „Луѓето се онесвестија, а кога побаравме лекар и лекови, тие ставија 60 луѓе во мали кафези и ни рекоа дека ќе нè убија со гас“, рече таа.
Таа ја критикуваше шведската влада, како и другите влади, за нивната неактивност. „Да бидам искрена, навистина не знам што да кажам, бидејќи без разлика што ќе кажеме, се чини дека ништо нема да ги натера нашите влади да преземат мерки против Израел“, се пожали таа.
фото: принтскрин