Портпаролот на рускиот претседател, Дмитриј Песков, денес предупреди дека ако Русија не успее мирно да ги постигне своите цели во Украина, специјалната воена операција ќе продолжи.

„Ако не сме во можност мирно да го решиме проблемот и да ги постигнеме нашите цели, ќе продолжиме со нашата работа и ќе направиме сè што е потребно за да ги заштитиме нашите интереси. Воената операција ќе продолжи“, рече Песков во интервју за „Раша тудеј“,

Тој посочи на позитивниот напредок на руските вооружени сили на терен.

Според него, Москва се надева дека процесот на преговори за украинското решение ќе добие моментум и дека темпото на преговорите за предлозите на САД ќе биде забрзано.

Песков истакна дека Москва е подготвена да почне сериозна работа врз основа на нацрт-договорот подготвен од Вашингтон, и дека ставот на Русија останува непроменет по договорите постигнати за време на самитот Русија-САД во Анкориџ.

„Ставот на Москва во моментов е доста јасен, доста е разбирлив и не се очекуваат промени. Иако, се разбира, ние сме подготвени да покажеме флексибилност со цел да се најде решение“, заклучи Песков.

Шведска ќе ја прекине помошта за развој за пет земји во наредните години и ќе ги искористи парите за да ја зголеми поддршката за Украина, објави шведската влада.

Скандинавската земја планира постепено да ја укине помошта за Зимбабве, Танзанија, Мозамбик, Либерија и Боливија, изјави министерот за меѓународна развојна соработка и надворешна трговија Бенџамин Дуса.

„Украина е најважниот приоритет на Шведска во надворешната политика и развојот, и затоа владата планира да ја зголеми помошта за Украина на најмалку 10 милијарди круни (910 милиони евра) во 2026 година“, рече Дуса.

Владата соопшти дека мерките ќе ослободат повеќе од две милијарди круни во текот на следните две години кои би можеле да бидат пренасочени кон Украина, за да се користат во проекти како што е обновата на енергетската инфраструктура на земјата.

Шведска веќе ја намали помошта за повеќе од 10 земји откако сегашната влада ја презеде власта во 2022 година, вклучувајќи ги Буркина Фасо и Мали.

Шведска е главен донатор на хуманитарна помош, со буџет што достигнува 56 милијарди круни годишно за овие цели во последните три години.

Бундестагот го одобри повторното воведување делумна воена регрутација со цел да се зголеми составот на вооружените сили како одговор на новите безбедносни предизвици.

„Слободите во демократијата не се бранат сами од себе. Ова мора да го прават луѓе што се подготвени да се залагаат за овие слободи, а не оние што седат зад оградата и чекаат некој друг да го стори тоа наместо нив“, рече германскиот министер за одбрана Борис Писториус (Социјалдемократска партија на Германија, СПД) во дебатата пред гласањето.

Според новиот закон, воената регрутација ќе се базира на доброволна основа. Во случај да не се појават доволно доброволни регрути во одредени години, Бундестагот би можел да воведе таканаречена воена регрутација на краткорочна основа.

Ќе се воведе и задолжителен прашалник за подготвеност за воена служба и воени способности, кој ќе го пополнуваат членови на одредена генерација, кои наполниле 18 години. Пополнувањето на овој формулар е задолжително само за млади мажи.

Според договорот на ниво на НАТО, Германија се обврзала да има 260.000 активни војници во германската армија, Бундесверот. Моментно во Бундесверот служат 185.000 регрути.

Доброволната воена служба би траела шест месеци и би обезбедувала месечна плата од 2.600 евра.

Денеска наутро, за време на дебатата во Бундестагот, во цела Германија се одржаа протести против повторното воведување на регрутацијата. Протестите, на кои главно учествуваа средношколци, се одржаа со слоганот „Не сакаме да бидеме топовско месо“.

Регрутацијата беше укината во Германија во 2011 година поради уставни пречки.