Во белградското предградие Батајница отворена е новоизградена ковид-болница со 930 легла, во девет одделенија и 250 места на интензивна нега.

Премиерката Ана Брнабиќ оцени дека новата болница започнува со работа „во најтешкиот момент“, кога со денови се регистрираат голем број новозаболени лица, а на ковид-одделенијата секој ден пристигнуваат речиси 800 пациенти.

„ Добиваме модерна болница во тешки моменти, кога притисокот врз нашиот здравствен систем е континуиран веќе девет месеци“ посочи Брнабиќ.

Српскиот министер за здравство Златибор Лончар објави дека најмалку 1.500 лекари, медицински сестри и техничари ќе работат во новата болница, но дека „1.600 се потребни за полн капацитет“. Лончар истакна дека се покажало дека „новата болница е од непроценливо значење не само за Србија, туку и за целиот регион“, бидејќи 250 места на интензивна нега ќе ги олеснат другите здравствени установи.

Србија добива нови болнички капацитети во време кога членовите на Кризниот штаб и независни експерти ја проценуваат епидемиолошката состојба како „катастрофална“, со оглед на тоа што во последните неколку дена бројот на нови пациенти и пациенти во болницата е скоро изедначен.

Српската влада донесе нови, построги епидемиолошки мерки.

Граѓаните на Москва, кои веќе почнаа да се вакцинираат со руската вакцина против коронавирус „Спутник V“, добиваат упатства за пациенти, како и потврда за извршена имунизација, кои содржат список со симптоми, кои можат да се јават по вакцинацијата, како и совети како да постапат во секој од наведените случаи.

Во упатствата се наведува дека секој десетти човек, вакциниран со вакцината „Спутник V“, може да почувствува слабост или мачнина. Во повеќе случаи вакцинацијата добро се поднесува.

Ако се јави физичка слабост, нема причина за грижа, тоа е нормална индивидуална реакција на организамот и еден од знаците за формирање имунитет. На оние кај кои по вакцинацијата ќе се јави слабост, општ замор и мачнина, им се советува да ја намалат физичката активност и повеќе да одмораат.

Исто така се нагласува дека кај 5,7 проценти од вакцинираните, може да се јават болки во коските, грозница, главоболка или температура повисока од 37 степени.

Кај 4,7 проценти може да се јави болка, оток, чешање и црвенило на местото од вакцинацијата. По правило, лекување не е потребно, но може да се земе лек против алергија за да се намали отокот и чувството на нелагодност.

Еден и пол процент од вакцинираните пациенти може да имаат затнат нос, течење на нос или чувство на скокотливост во грлото. На нив им се советува да пијат многу течности и користат спреј за нос.

Кај помалку од 1 процент, пак, може да дојде до забрзување на пуслот или повишен крвен притисок.

Рускиот претседател, Владимир Путин, претходно побара од потпретседателката на владата, Татјана Голикова следната недела да почне масовна вакцинација против коронавирус.

Шефот на американското разузнавање Џон Ретклиф оцени дека Кина е најголемата закана за демократијата и слободата во светот од Втората светска војна, додека Вашингтон го заострува издавањето визи на членовите на кинеската Комунистичка партија.

Во статија објавена во „Волстрит журнал“, Ретклиф исто така ја осуди кинеската кражба на американските деловни тајни и одбранбени технологии.

„Денес, Народна Република Кина претставува најголема закана за Америка и е најголема закана за демократијата и слободата во светот од Втората светска војна“, напиша шефот на американските разузнавачки служби.

Тој исто така ги опиша операциите во кои кинеските агенти користеа економски притисок за да влијаат или да ги компромитираат американските законодавци.

„Кинеските лидери се обидуваат да ги потчинат правата на поединецот на волјата на Комунистичката партија“, рече Ретклиф.

Во исто време, американскиот Стејт департмент објави дека членовите на Комунистичката партија на Кина се непријателски расположени кон американските вредности.

Според новите правила, кои стапуваат на сила веднаш, визите издадени на членовите на кинеската партија и нивните семејства ќе важат само еден месец по издавањето и тоа за еден влез, додека претходно тие важеа до 10 години и дозволуваа неограничен број влезови во САД.