Нафтената дамка настаната по минатонеделната експлозија и потонатата платформа „Бритиш Петрол“ во Мексиканскиот залив, стигна до брегот на Луизијана и почна да ги загрозува најдобрите подрачја за риболов во САД, како и екосоставот во областа.

Нафтената дамка настаната по минатонеделната експлозија и потонатата платформа „Бритиш Петрол“ во Мексиканскиот залив, стигна до брегот на Луизијана и почна да ги загрозува најдобрите подрачја за риболов во САД, како и екосоставот во областа.

Нафтената дамка е пет пати поголема од првичните предвидувања и доколку не се сопре понатамошното истекување на нафтата, на загрозеното подрачје му се заканува еколошка катастрофа поголема од онаа која ја погоди Алјаска по хаваријата на супертанкерот „Ексон Валдез“ во 1989. година, од кој се излија 50 илјади тони нафта, известуваат американските медиуми.

Експертите предвидуваат дека нафтата која истекува од пробушената „дупка“ на „Бритиш Петрол“ со сегашното темпо од околу 23 тони дневно би требало да истекува два месеци за да ја достигне количината на „Ексон Валдез“, и дека се работи за лесна нафта која побрзо се разредува за разлика од тешката нафта на Алјаска.

Меѓутоа, експертите предупредуваат дека развојот на ситуацијата е тешко да се предвиди, бидејќи се уништени инсталациите од кои истекува нафтата на длабочина од 1.500 метри, што ги отежнува напорите да се сопре истекувањето.

„Јас сум престрашен. Ова е голема, голема работа. Напорите кои ќе бидат потребни да се направи нешто, особено ако истекувањето продолжи, ќе го надмине човековиот потенцијал за заштита,“ рече Дејвид Кенеди од Националната управа за океани и атмосфера.

Нафтената дамка би можела да биде најлошата еколошка катастрофа во последните  неколку децении во САД бидејќи ги загрозува чувствителните екосостави на бреговите на Луизијана, Мисисипи, Алабама и Флорида, кои се дом на стотици видови птици, и големо мрестилиште за рибните фондови на Мексиканскиот залив, едно од најбогатите риболовни подрачја на светот, кое изобилува со шкампи, ракови и разни видови на риби.

Бродовите на Крајбрежната стража и компанијата „Бритиш Петрол“, со помош на локалните рибари поставија километри долги заштитни црева кои треба да заштитат од продорот на дебелите слоеви на нафтата до бреговите. Се распрскуваат и хемиски средства за разградување на нафтата како и контролирано се палат најдебелите слоеви. крај/хи/ко