Секојдневните убиства во мексиканскиот град Сиудад Хуарез, директно наспроти градот Ел Пасо во Тексас, САД, станаа толку нормална појава, што повеќе не шокираат, јавува агенцијата Ројтерс, пренесува Макфакс

Секојдневните убиства во мексиканскиот град Сиудад Хуарез, директно наспроти градот Ел Пасо во Тексас, САД, станаа толку нормална појава, што повеќе не шокираат, јавува агенцијата Ројтерс, пренесува Макфакс.

Доколку овој град не ги отфрли сите претходни индикатори и не спроведе драматичен преврат во сферата на безбедноста, бројот на мртвите од почетокот на нарко–војната во јануари 2008 година овој месец ќе достигне 6.000. Тоа е повеќе отколку сите загинати американски војници во војните во Ирак и во Авганистан заедно. Тоа е исто така трагична одредница, постигната со убиствата на претежно малолетните платени убијци, на полицајци, зависници од дрога, дилери и луѓе кои не успеале да ги „исплукаат“ парите за рекет или за откуп по грабнување.

Мрачната етикета го истакнува силниот пад на Сиудад Хуарез, кој во текот на 1990-те години беше фален како пример  на слободната трговија, градот кој преку Северноамериканскиот договор за слободна трговија требаше да донесе просперитет и стабилност за целиот регион со своите фабрики за машини за садови и телевизори, сместени на самата граница. Регионот Сиудад Хуарез – Ел Пасо навистина оствари промет од околу 50 милијарди долари во 2008 година, но многу малку од тоа богатство остана во Сиудад Хуарез.

Федералната полиција за агенцијата Ројтерс минатиот месец изјави дека бројот на убиствата се намалил откако тие ја преземале контролата врз градот во април годинава. Но, се чини дека ништо не може да биде подалеку од вистина од ова тврдење. Според бројките објавени во угледниот дневен весник од Сиудад Хуарез, „Ел Диарио“, јуни бил најкрвавиот месец со 306 убиства, а во јули може и да се надмине таа бројка, бидејќи само во првите 13 дена од месецот се убиени 130 луѓе.

Она што се повеќе станува јасно е дека нарко-војната во градот си добива своја сопствена животна форма и повеќе не е ограничена на борбата за територија помеѓу врвниот шверцер од провинцијата Синалоа, Хоакин „Шорти“ Гузман, најбараниот човек во Мексико и доминантниот картел „Хуарез“. Иако Сиудад Хуарез и натаму останува најстратешката порта кон пазарот на наркотици во САД, борбата се води и за локалниот нарко-пазар, кој збувна на преку 200.000 зависници во град со 1,5 милиони жители. Секој кој продава дрога за десетиците нарко-банди под чадорот на картелите од Синалоа или од Хуарез се наоѓа на линијата на огнот. Активистите за човекови права и експертите за трговија со дрога обвинуваат дека илјадниците федерални полицајци и војници кои беа испратени за да ја потиснат трговијата со дрога се длабоко инволвирани бизнисот со наркотици. Силите за безбедност негираат какви и да било неправилности.

Нештата не изгледаат добро за Сиудад Хуарез. Ветувањата на претседателот Фелипе Калдерон, дадени  во февруари, дека ќе создаде работни места, ќе ги намами младите да ги напуштат нарко-бандите и ќе ги регенерира најопасните делови на градот, се уште не донесоа резултати. Наредниот градоначелник на градот, кој треба да ја преземе функцијата во октомври, е обвинет дека е човек на картелот „Хуарез“, иако тој негира какви и да било врски со картелот. Гувернерот на федералната држава Чихуахуа, во која е и Сиудад Хуарез, беше обвинет дека во текот на неговата предизборна кампања користел авион во сопственост на локален бизнисмен, кој беше уапсен од ФБИ во јуни годинава под обвинение дека перел пари за нарко-картелите. Многу неславен почеток и за двајцата. /крај/