Свет
Авионот што се урна со бразилските фудбалери му припаѓал на венецуелски политичар и бизнисмен, имал проблеми со горивото

Авионот кој се урна во близина на колумбискиот град Меделин во вторникот утрото, му припаѓал на венецуелскиот бизнисмен и поранешен политичар Рикардо Албасете, а екипажот на леталото со кое се превезуваа и бразилските фудбалери непосредно пред падот јавил за недостиг од гориво и откажување на системот за напојување, пренесуваат медиумите во средата вечерта.
Пред шест години, во 2010-та, поранешниот политичари Рикардо Албасете во Венецуела ја регистрирал воздухопловната компанија „Linea Aerea Meridena Internacional de Aviacion“ (LAMIA). Според агенцијата Reuters, Управата за цивилно воздухопловство на Венецуела не му издало лиценца на авиопревозникот, но причините за тоа не се прецизирани. Подоцна бизнисменот ги издал своите три авиона на независниот од неговата компанија авиопревозник „LAMIA Bolivia“, од кои еден се урнал во вторникот.
Според челникот на боливиската агенција за цивилна авијација, Цезар Варела, урнатиот авион бил сертифициран во јануари 2016 година.
Албасете претходно имал во сопственост и управувал со книжарници, енергетска компанија и организации за образовни услуги. Во 1990-те тој бил влијателен член на венецуелската лева социјалистичка партија Радикално дело.
Екипажот на авионот во кој настрада речиси целиот тим на бразилскиот фудбалски клуб Шапекоенсе, пред падот до контролата на летањето пријавил недостиг од гориво и грешка во системот за напојување со струја, пишува интернет изданието на дневниот весник El Colombiano, кој ја објавува аудио снимката од разговорот меѓу пилотот и диспечерот.
„Барам приоритет за слетување, имаме проблем со горивото“, зборува пилотот во втората минута од снимката. По разговорот со контролорот, авионот започнал со остро понирање. Во деветтата минута пилотот повторно воспоставува врска и вели дека „во авионот целосно откажал системот за снабдување со струја и нема гориво“. По три минути снимката завршува.
Како што претходно соопштија од меѓународниот аеродром „Хозе Марија Кордоба“, каде што требало да слета авионот во 22 часот по локално време или во 4 утрото по македонско, екипажот претходно пријавил итна ситуација поради „проблем со системот за електронапојување“. Директорот на Управата за цивилна воздушна пловидба на Колумбија, Алфредо Боканегра, не исклучи и тогаш дека причина за трагедијата можно да е недостиг од гориво.
Авионот на боливиската воздухопловна компанија се урна во близина на градот Ел Гордо, недалеку од општината Ла Унион, во департманот Антиокија, во понеделникот вечерта по локално време. Според последните податоци во него се наоѓале 77 лица, од кои 22 играчи на бразилски Шапекоенсе. Несреќата ја преживеаја шест лица./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ го осуди убиството на полицаецот: Се побунија Срби од Косово не можејќи да го трпат теророт на Курти

Србите, а не луѓето од централна Србија како што лажеа, се револтираа и не сакаат повеќе да го трпат теророт на Курти. Од 3 ноември, кога Курти го разреши Ѓуриќ, тие ја користеа косовската полиција против Србите 62 пати, 22 ескалирачки потези во северот на Косово, 56 етнички мотивирани напади врз Србите. Беше само прашање кога, особено оние кои ги гони полицијата и кои постојано се движат по централната релација Србија-Косово, ќе се обидат да направат нешто за себе и за своите семејства. Не сакам да го оправдам убиството на албански полицаец, тоа е за осуда и тоа никому не му требаше во моментот кога сите сфатија дека Курти е главниот организатор на хаосот во Косово, изјави вечерва српскиот претседател Александар Вучиќ.
„За само еден час и дваесет минути тие неколку десетици Срби беа целосно опколени, очигледно тоа е направено заедно со меѓународните сили. Беше извршен брутален напад врз нив и на почетокот се чудевме зошто КФОР не го направи тоа, ќе имаше помалку жртви. Според нашите информации со кои располагаме, потврдено е дека се убиени тројца Срби од Косово. Двајца од снајперски оган, кога не мораше да бидат ликвидирани. Двајца од нив се тешко ранети, а се стравува дека е убиено и четврто лице. Следевме, пресретнавме што прави албанската полиција, доказите ќе ви ги покажеме, можеби и на конференцијата, само го чекаме преводот“, рече Вучиќ.
Претседателот на Србија наведе дека прашање е дали едно лице ќе преживее само затоа што не сакале да му помогнат и дека имаат аудио снимки на кои албанската полиција се смее и вели „нека умре“.
„Група Срби од Косово и Метохија поставија два камиони како барикади во Бањска на северот на Косово, потоа пристигнува косовската полиција и се обидува да ги отстрани барикадите, по што доаѓа до конфликт во кој е убиен албански полицаец, а едно лице е рането“, изјави Вучиќ на првата медиумска конференција и додаде дека не се обратиле порано, бидејќи требало да има време да се испита што се случило и да се донесат одлуки што Србија ќе ги спроведе.
Како што додаде, иако секој ден во Брисел и Њујорк предупредувал дека сето ова може да се случи, малкумина сакале да слушнат.
„Курти е единствениот виновник за се. И дел од меѓународната заедница која му помага. Тој е единствениот што сака конфликти и војна, неговата животна желба е да не вовлече во војна со НАТО. Жал ми е што тамошните Срби паднаа на неговите провокации. Наше е да направиме се што можеме за да спречиме повеќе крвопролевање и да го зачуваме мирот. Но, ако некој мисли дека… За тоа подоцна, не е важно. Кога ќе донесеме одлука, ќе ве известиме. Знам на што се способни луѓето во гневот, но да бидеме паметни“, рече претседателот на Србија и истакна:
„Ние сме подготвени да разговараме. Но, за признавање – заборавете!“
Косовската полиција потврди дека се уапсени пет лица, од кои едно е директно поврзано со пукањето, додека четворица од нив се осомничени за логистичка поддршка. Според полицијата, кај нив биле пронајдени радио станици, муниција и значително количество оружје.
Рашко-призренската епархија соопшти дека група вооружени маскирани лица со оклопно возило влегле во манастирот и ја пробиле заклучената порта на манастирот. Ситуацијата во Бањскиот манастир моментално е мирна, а вооружените лица кои денеска ја пробија капијата го напуштија манастирот. Во моментов е забележано присуство на косовската полиција пред влезната капија и во дворот на манастирот, соопшти Рашко-призренската епархија.
Регион
(Во живо) Прво обраќање на Вучиќ за немирите во Косово

Српскиот претседател, Александар Вучиќ, се обраќа за немирите што од синоќа се случуваат на северот на Косово, кај селото Бањска.
- Според досегашните информации на властите во Приштина, вооружена група пукала кон косовски полицајци, пришто еден загина, а други двајца беа повредени.
- Во престрелките што траеа во текот на целиот ден, според информациите на косовската полиција, застрелани беа три лица од вооружената група, а приведени петмина.
- Меѓународната заедница ги осуди нападите.
- Вооружената група потоа упадна во дворот на Бањскиот манастир, а верниците и свештените лица останаа внатре. Рашко-призренска епархија по неколку часа објави дека групата се повлекла и во манастирот е мирно, но има неизвесност и загриженост кај монасите и верниците.
- Косовскиот премиер, Албин Курти, за состојбата на северот директно ја обвини Србија дека ги финансирала и поддржала напаѓачите, опишувајќи ги настаните како терориризам.
- Во близина на манастирот, во хотел има и седум македонски државјани, меѓу кои и дете. Косовска полиција го обезбедува хотелот, велат од МНР.
Регион
Борел разговараше со Курти и Вучиќ

Високиот претставник на Европската унија за надворешна политика и безбедност, Жосеп Борел, денеска разговараше со премиерот на Косово, Албин Курти, по повод престрелките во Косово што Приштина ги опиша како терористички напад и го обвини Белград, а загина еден косовски полицаец.
Борел најостро ги осуди денешните постапки, се вели во соопштението објавено на веб-страницата на Европската служба за надворешни работи.
Тој изрази сочувство до семејството, колегите и роднините на убиениот полицаец, а на повредените полицајци им посака брзо закрепнување.
Како што се додава, Борел разговарал и со претседателот на Србија, Александар Вучиќ.
Борел го повторил барањето до напаѓачите веднаш да се предадат и да ги ослободат верниците од манастирот Бањска.