Преживеани од поплавите во Пакистан блокираа автопат во знак на протест поради многу бавната достава на хуманитарната помош, додека силните дождови кои ги уништија и нивните импровизирани живеалишта ја носат заканата за нови поплави , јавува Асошиејтед прес.

Најлошите поплави запишани во историјата на Пакистан започнаа пред повеќе од две недели во планинските предели на северозападот на земјата и се проширија низ целата земја. Околу 20 милиони луѓе и 160.000 квадратни километри земја, една петтина од вкупната површина на Пакистан, се погодени од поплавите. Илјадници бесни жртви на поплавите го блокираа главниот патен правец во близина на областа Сукур, во знак на протест поради тоа што, како што велат, биле третирани полошо од животните. Тие тврдат дека државните функционери доаѓаат да делат храна само кога се присутни медиумите. „Тие ни ги фрлаат пакетите со храна како да сме кучиња. Со тоа не тераат да се тепаме за храната, исто како кучиња“, вели еден од протестантите. Министерот за наводнување на провинцијата Синд, која е една од најпогодените, Џам Саифула Дареџо, вели дека наредните неколку дена ќе бидат клучни поради тоа што надојдените води од реката Инд, кои  се слеваат во густо населеното земјоделско подрачје на Пакистан ќе ја тестираат издржливоста на локалната брана во Сукур до крајни граници. Во неделата погодените области во Пакистан ги посети и генералниот секретар на ОН, Бан Ки-мун, при што изјави дека никогаш во животот не видел такво уништување. И тој  апелираше до меѓународната заедница да ја забрза помошта.  Светското тело побара достава на првична помош од околу 460 милиони долари, од која 60 проценти се веќе доставени. Најновите поплави предизвикани од силните дождови во текот на викендот најжестоко го погодија сиромашниот предел на границата меѓу провинциите Синд и Балучистан. Според локалните власти, соопшти дека околу 25.000 семејства останале без своите домови, однесени од водата која на места била длабока и до 2,5 метри. Преку 4.000 мали села се или отсечени или целосно збришани од поплавите. Кога ќе се повлечат поплавите, на Пакистан ќе му бидат потребни милијарди долари за ги обнови уништените подрачја и да ги обнови работните места во и онака пресиромашната држава со население од околу 170 милиони луѓе. ММФ веќе предупреди дека поплавите сериозно ќе му наштетат на економскиот раст на Пакистан и ќе поттикнат силна инфлација. Иако многу од жртвите добија помош преку разните хуманитарни организации, уште милиони луѓе се оставени со минимална или никаква помош. ОН предупреди на можна појава на заразни болести во пренатрупаните кампови.Пред два дена во некои засегнати области се појавија случаи на колера. крај/ап/ссе/