Тригодишно дете во Рим, Италија, излегло од станот, тропнало на вратата на соседите и раскажало како неговиот татко, кој се вратил пијан дома, ја тепал неговата мајка, пишува весникот „Монца тудеј“.

Соседите повикале полиција, а за неколку минути карабинерите го пронашле пијаниот маж кој ја гризел, ја удирал со нозе и со тупаници сопругата, нанесувајќи ѝ повреди. Таткото, кој и пред овој случај имал други прекршоци, е фатен на дело и веднаш е испратен во затвор.

Мајката на тригодишно момче завршила во болница. Таа ѝ изјавила на полицијата дека ова не е прв случај на малтретирање на семејството.

Според италијанските закони, лице кое злоупотребува членови на семејството ризикува затворска казна од три до седум години, а казната се удвојува доколку делото насилство било сторено во присуство на малолетници.

Доколку член на семејство злоупотреби малолетник (дете), законот предвидува поголема казна, од четири до девет години затвор, а ако последица на агресија е повреда на малолетник, казната е од седум до единаесет години.

37-годишна Србинка заедно со нејзиното новороденче е притворена во Шпанија, откако тамошната полиција спровела истрага во која е откриена балканска банда од 30 члена. Истрагата за групата која била предводена од 37-годишната Србинка започнала пред два месеца, пишуваат медиумите.

Причина за покренување истрага бил пожар во куќа во местото Оливела, Барселона. Причината за пожарот биле нелегални електрични инсталации кои, како што било откриено, снабдувале насади со марихуана.

Наскоро било утврдено дека куќата, како и другите на периферијата на Барселона, ја изнајмила родилката од Србија со нејзиниот партнер. Во изнајмените куќи, како што било откриено понатаму, Србинката направила цела мрежа на лаборатории (или плантажи) во кои одгледувала марихуана.

Извршени биле 19 претреси при што се запленети 12.600 растенија.

Работниците на насадите биле претежно српски државјани. Повремено таа носела нови работници, а старите ги враќала во Србија за да не предизвика сомнеж. Дел од нив имале лажни хрватски и словенечки пасоши.

Најмалку пет лица, меѓу кои три деца, беа убиени кога ирачки милитантни групи истрелаа две ракети „каќуша“, кои погодија куќа во Багдад. Информацијата ја соопшти ирачката армија.

Според изјавата, три деца и две жени биле убиени, додека уште две деца биле повредени во нападот, пренесува „Ројтерс“.

Неименувани полициски извори соопштија дека целта била аеродром во Багдад. Ова е првпат по неколку месеци да бидат убиени цивили во нападот, додава АП.

Според официјалните лица, ракетата била истрелана од населбата Ал-Џихад во Багдад.

Нападот е последен во низата ракетни и минофрлачки напади на американското присуство во Ирак, вклучувајќи ја и Амбасадата на САД во Зелената зона.