Американскиот претседател во заминување Џо Бајден во својот проштален говор предупреди за „опасна олигархија што се појавува во Америка“. Со своето последно обраќање до јавноста, тој стави крај на повеќедецениската кариера во политиката.

„Денес во Америка се создава олигархија на екстремно богатство, моќ и влијание што навистина ја загрозува целата наша демократија, нашите основни права и слободи“, рече Бајден (82), додавајќи дека „ултра богатиот технолошко-индустриски комплекс“ може имаат неконтролирана моќ над Американците.

Во своето последно обраќање од Белата куќа, тој предупреди и за климатските промени и дезинформациите што се шират на социјалните мрежи.

Говорејќи од Овалната соба, тој ги пофали достигнувањата на неговата администрација, наведувајќи ги отворањето работни места, трошењето за инфраструктура, здравството, извлекувањето на земјата од пандемијата и правењето на САД побезбедна земја.

Тој, сепак, додаде дека „ќе биде потребно време за да се почувствува целосното влијание на сето она што го направивме заедно, но семето е засадено, тие ќе растат и ќе цветаат во следните децении“. Бајден и посака успех на новата администрација на Доналд Трамп, но потоа издаде серија остри предупредувања, велејќи дека „сега има многу на коцка“.

За климатските промени, тој рече дека „моќните сили сакаат да го искористат своето неконтролирано влијание за да ги елиминираат чекорите што ги презедовме за справување со климатската криза за да им служи на нивните сопствени интереси – се за моќ и профит“.

Зборувајќи за дезинформации, Бајден предупреди дека „Американците се преплавени од лавина дезинформации и дезинформации, кои овозможуваат злоупотреба на моќта“.

Тој удри и на социјалните мрежи како Мета, која неодамна објави дека ќе се ослободи од независните проверувачи на факти. „Социјалните медиуми се откажуваат од проверката на фактите. Вистината се задушува со лаги кажани за моќ и профит“, рече Бајден.

И неговиот напад на ултра богатиот „технолошко-индустриски комплекс“ беше прикриено повикување на лидерите од Силиконската долина, како што е Илон Маск, најбогатиот човек во светот кој е близок со Трамп и обезбеди голема финансиска поддршка за неговата кампања.

Други технолошки шефови како Џеф Безос и Марк Цукерберг вложија напори да ги подобрат односите со Трамп пред неговото враќање во Белата куќа.

Завршувајќи го својот говор, Бајден ги повика Американците да ја „чуваат“ својата земја: „Сите вие ​​бидете чувари на пламенот“. Неговото проштално обраќање дојде истиот ден кога го објави договорот за прекин на огнот меѓу Израел и Хамас, на кој тој се осврна во воведните зборови.

Бајден рече дека преговорите биле едни од најтешките во неговата кариера и ја презеде заслугата што помогнал да се затвори договорот.

Со договорот, примирјето ќе стапи на сила на 19 јануари, ден пред Трамп да ја преземе функцијата. Новиот претседател, исто така, ја презеде заслугата за договорот, велејќи дека тоа е можно само затоа што победил на изборите во ноември.

Хамас објави дека постигнувањето на договор за прекин на огнот во Газа и за заложниците претставува клучна пресвртница во неговата борба против непријателот.

„Договорот за запирање на агресијата врз Газа е достигнување за нашиот народ, нашиот отпор, нашата нација и слободните луѓе во светот. Тоа означува клучна пресвртница во борбата против непријателот, на патот кон постигнување на целите на нашиот народ за ослободување и враќање, се вели во соопштението на Хамас, пренесено од „Си-ен-ен“.

Хамас им се заблагодари на посредниците кои вложија големи напори да го постигнат овој договор, особено Катар и Египет.

Семејствата на израелските заложници со радост и олеснување ја дочекаа веста за договорот помеѓу Израел и Хамас со кој ќе се ослободат 33 лица кои се држат во заложништво во Газа.

„Сакаме да ја изразиме нашата длабока благодарност до новоизбраниот претседател Трамп, претседателот Бајден, двете администрации и меѓународните посредници што го овозможија тоа“, се вели во соопштението на Форумот за заложници и исчезнати семејства.

„Од ноември 2023 година, со нетрпение го очекуваме овој момент, а сега, по повеќе од 460 дена од држењето на членовите на нашето семејство во тунелите на Хамас, ние сме поблиску од кога било до повторното обединување со нашите најблиски“.

„Ова е значаен чекор напред што нè приближува до враќањето на сите заложници – живите за да заздрават и починатите за достоинствено да бидат погребни. Сепак, длабока вознемиреност и загриженост нè придружуваат во врска со можноста договорот да не биде целосно имплементиран, оставајќи уште заробени заложници. Итно повикуваме на брзи подготовки за да се обезбеди спроведување на сите фази од договорот“, се вели во соопштението.

„Нема да се одмориме додека не го видиме последниот заложник дома“, се додава.

Договорот за прекин на огнот вклучува три фази, од кои во првата се очекува да бидат ослободени 33 израелски заложници. Претседателот на САД, Џо Бајден, изјави дека во следните месеци додека се спроведува првата фаза од договорот, ќе се преговара за втората која би можела да значи ставање целосен крај на војната и ослободување на останатите лица, како и пренесување на смртните останки, во третата фаза, на оние кои го загубија животот во заложништво додека траеа борбите во Газа.

Првата фаза од договорот ќе трае 42 дена.