Свет
Обама својот проштален говор до нацијата ќе го има на 10-ти јануари

Американскиот претседател на заминување Барак Обама ќе го одржи својот проштален говор на 10-ти јануари во својот роден Чикаго, во сојузната држава Илиноис, кога ќе се осврне на годините во коишто ги предводеше САД и ќе им се заблагодари на своите поддржувачи, соопшти во понеделникот преку електронска пошта а подоцна со соопштение потврди и Белата куќа.
„Во вторник, 10-ти јануари, заминувам дома во Чикаго за со благодарност да се простам од вас“, се наведува во пораката на Барак Обама. Според актуелниот американски челник, тој само што започнал да го пишува текстот од говорот.
„За говорот размислувам како за можност да ви се заблагодарам за ова неверојатно патување, да ги прославам начините на кои изминатите осум години ја подобривте оваа земја, и да понудам некои мисли за тоа на каде да се продолжи оттука“, пишува Обама.
„Од 2009-та се соочивме со повеќе предизвици, и од нив излеговме посилни. Тоа е затоа што никогаш не се откажувавме од вербата којашто нé води од нашето основање – нашето уверување дека заедно можеме да ја промениме оваа држава на подобро“, заклучува Обама.
Тој во неделата во новогодишната порака, 19 дена пред предавањето на должноста, изјави дека должноста претседател на САД за него била „привилегија“. Да се служи како ваш претседател ми беше животна привилегија, Се радувам на тоа што ќе стојам до вас како граѓанин…“, напиша Обама на Twitter.
Обама ги искористи своите профили на социјалните мрежи за мултимедијален пресек на постигнувањето на неговите осум години на функцијата претседател на САД, од реформите на здравственото осигурување и легализирањето на исполовите бракови, до борбата против климатските промени и растот на енергетскиот сектор на обновливи извори на енергија.
Американскиот претседател на заминување потсетува дека преседанот на „мирно демократско предавање на власта“ и обраќањето со „проштален говор до американскиот народ“ го направил во 1796 година првиот претседател Џорџ Вашингтон. „Во наредните 220 години многу американски претседатели, одржаа таков говор“, истакнува Обама.
Во поновата американска историја со проштално обраќање до нацијата од должноста заминаа претседателите Хари Труман, Двајт Ајсенхауер, Линдон Џонсон, Ричард Никсон, Роналд Реган, Бил Клинтон. Претходникот на Обама, републиканецот Џорџ В. Буш, својот проштален говор го одржа во 2009 година од Белата куќа.
На 20-ти јануари Обама на претседателската должност ќе го замени републиканецот Доналд Трамп, кој на изборите на 8-ми ноември ја победи демократската кандидатка Хилари Клинтон. Трамп во својата кампања се обврза дека ќе поништи голем дел од мерките воведени од Обама, вклучително и за здравствениот систем./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп повторно би го бомбардирал Иран ако извештаите покажат загрижувачки заклучоци за збогатување на ураниум

Претседателот на САД, Доналд Трамп, денес изјави дека апсолутно ќе го преиспита бомбардирањето на нуклеарните објекти на Иран доколку смета дека е потребно, пишува „Си-ен-ен“
„Секако, без сомнение, апсолутно“, им рече Трамп на новинарите во брифингот во Белата куќа, кога директно беше прашан дали би размислил за бомбардирање на земјата доколку идните разузнавачки извештаи покажат загрижувачки заклучоци за збогатувањето на ураниум на Иран.
Трамп рече дека не верува дека Иран би можел „повторно да влезе во нуклеарната програма во скоро време“ по нападите на САД врз неговите нуклеарни објекти минатата недела.
Администрацијата продолжи да изразува доверба во успехот на тие напади, но не понуди никакви разузнавачки податоци за да го поткрепи тврдењето на Трамп дека нуклеарната програма на Иран е, според неговите зборови, уништена.
„Може ли да ви кажам – тие се исцрпени. И Израел е исто така исцрпен. Разговарав со едната и со другата земја, и двете сакаа тоа да се реши – и двете – и ние направивме одлична работа. Но, тие се исцрпени. Последното нешто за кое размислуваат во моментов е нуклеарното оружје. Знаете за што размислуваат? Тие размислуваат за утре, за тоа како да преживеат“, рече американскиот претседател.
Свет
Велика Британија почна да ги одбива украинските бегалци: „Можете да одите во безбеден дел од Украина“

Обединетото Кралство почна да ги одбива барањата за азил од Украинците, тврдејќи дека апликантите можат безбедно да се преселат во други делови од Украина, соопшти „Гардијан“.
Адвокатска фирма со седиште во Лондон изјави за „Гардијан“ дека добива неделни барања од Украинци во чии писма за одбивање често стои дека не ги исполнуваат условите за прогон според Конвенцијата за бегалци, бидејќи се смета дека можат да се преселат во побезбедни делови од Украина.
Во писмата, исто така, се споменува достапноста на јавни услуги во Украина и се предлага да се побара помош од Високиот комесаријат на ОН за бегалци (УНХЦР) и локалните организации.
Компанијата забележува дека зголемувањето на одбивањата е поврзано со промените во упатствата на Министерството за внатрешни работи на Велика Британија во јануари, кои сега ги сметаат регионите како Киев и западна Украина за „генерално безбедни“.
Статусот на бегалец во Велика Британија им дава на примателите пет години престој со право на работа, социјална помош, здравствено осигурување, помош за домување и семејно обединување.
Велика Британија, исто така, нуди привремени визи преку програмите „Домови за Украина“ и „Украинско семејство“, кои овозможуваат престој до 18 месеци. До март 2025 година, беа издадени повеќе од 270.000 визи.
Околу 4,3 милиони Украинци добија привремена заштита во ЕУ
Портпарол на Министерството за внатрешни работи изјави за Гардијан дека Велика Британија понудила или продолжила заштита на повеќе од 300.000 Украинци откако започна конфликтот во февруари 2022 година. Министерството за внатрешни работи нагласи дека барањата за азил се оценуваат од случај до случај и дека шемата „Домови за Украина“ останува отворена.
Неколку милиони Украинци ја напуштиле земјата во последните три години. Според податоците на Евростат, околу 4,3 милиони добиле привремена заштита во ЕУ до март 2025 година.
Лондон ѝ вети на Украина милијарди воена помош од 2022 година.
Свет
Путин: Подготвен сум да се сретнам со Трамп, го почитувам

Рускиот претседател Владимир Путин изјави дека односите меѓу Русија и Соединетите Американски Држави почнуваат да се стабилизираат, што го припиша на напорите на американскиот претседател Доналд Трамп.
Путин повтори дека има голема почит кон Трамп и дека е подготвен да се сретне со него. Иако таквата средба би барала внимателна подготовка, Путин рече дека тоа е „целосно можно“.
„Општо земено, благодарение на претседателот Трамп, односите меѓу Русија и Соединетите Американски Држави почнуваат да се враќаат во рамнотежа на некој начин“, рече Путин на прес-конференција во Минск.
„Не е сè одлучено во сферата на дипломатските односи, но првите чекори се преземени и ние напредуваме“, додаде тој.