Свет
Косовски кадри ќе бидат македонски амбасадори

За амбасадата во Стокхолм се спрема Агон Демјаха, за Брисел и ЕУ веќе е сигурен Блерим Река, а во ОБСЕ во Виена ќе патува Арсим Зеколи.
ПРОФЕСИОНАЛИЗАЦИЈА НА ДИПЛОМАТИЈАТА ПО РЕЦЕПТ НА СДСМ и ДУИ
За амбасадата во Стокхолм се спрема Агон Демјаха, за Брисел и ЕУ веќе е сигурен Блерим Река, а во ОБСЕ во Виена ќе патува Арсим Зеколи. Река бил професор на Универзитетот во Приштина, и речиси сиот свој работен век го минал на Косово како "истакнат к
Македонската Влада токми четири нови амбасадори кои треба да ги пополнат испразнетите дипломатски претставништва во Шведска, Словенија, мисијата на Македонија во ОБСЕ, и мисијата во седиштето на ЕУ во Брисел. Според извори во Владата, веќе се познати и имињата на идните дипломати, од кои тројца се луѓе предложени од ДУИ, коалициониот партнер на СДСМ кој при делбата на амбасадите ги доби Шведска, ОБСЕ и ЕУ.
Наши соговорници во МНР велат дека за амбасадата во Стокхолм се спрема Агон Демјаха, за Брисел и ЕУ веќе е сигурен Блерим Река, а во ОБСЕ во Виена ќе патува Арсим Зеколи. Според наши извори, Зеколи веќе ја добил согласноста на Владата за амбасадорската функција, и тој наводно ги почнал подготовките во МНР. Со неговото именување македонската мисија во ОБСЕ по повеќе од една година конечно добива прв човек, оти ДУИ не успеа да најде кандидат за амбасадор, откако тоа место го одбија двајца нивни фаворити. Во биографијата на Зеколи пишува дека е роден во Сухарека, Косово, во 1966 година, и дека имал кратка кариера како новинар, по што работел во канцеларијата на УНМИК во Скопје, Националниот демократски институт и во УНПРЕДЕП, дека завршил историја на уметност и археологија на Универзитетот "Свети Кирил и Методиј", каде во моментов е на постдипломски студии по меѓународно право. Покрај мајчиниот албански јазик, стои во биографијата, зборува одлично македонски, српски и англиски.
За останатите двајца, пак, во МНР не можеа да се добијат многу податоци.
Река во моментов е професор на Штуловиот универзитет, а во јавноста се знае дека бил професор на Универзитетот во Приштина, и дека речиси сиот свој работен век го минал на Косово како "истакнат косовски правник", како советник во работната група за изготвување на привремениот косовски устав, а неговото име кратко време се вртеше и како дел од тимот советници во преговорите за статусот на покраината. Владини извори коментираат дека амбасадорската функција му била понудена токму откако испаднал од преговарачкиот тим. Сепак, официјално, во МНР и во Владата тврдат дека Река е солиден избор со кој немаат проблем, а наводно, го пофалиле и странците.
И за третиот пик, Демјаха, од МНР не можат да се добијат повеќе информации, освен тоа дека и тој работел на Косово како основач на Косовската фондација за цивилно општество, а сега ја води Балканската фондација за деца и млади, со седиште во Скопје. Тој, пак, коментираат владини извори, во последен момент влетал во комбинација за Шведска, оти тоа место, по завршувањето на мандатот на амбасадорот Мартин Треневски и неколкумесечната празна амбасада, требаше да го завземе финансискиот шеф на ДУИ, Абдулхалим Касами.
За Љубљана, пак, веќе е сигурно дека оди адвокатот Самоил Филиповски, кој му беше бранител на Љубе Бошковски во случајот Раштански лозја, го застапувал и Амди Бајрам, а неговото име го спомнуваше и гостиварскиот Карлито Бриганте. Наши извори во Владата велат дека за него веќе паднал договор и со Претседателот, оти тој бил солидно економско решение за Словенија, и дека е близок и со премиерот Бучковски.
Некаде неделава, според најавите, би можело да се очекува да почнат консултациите на Владата и претседателот за новите амбасадори во САД и НАТО, чии мандати беа продолжени до февруари.
Л. Јаневск
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Путин до Западот: Купија билет и не патуваа, само за да се налутат на кондуктерот: рускиот енергетски систем работи беспрекорно

Рускиот претседател Владимир Путин изјави дека одбивањето на европските земји да се потпираат на руските енергетски ресурси сериозно ја поткопа конкурентноста на нивните економии и доведе до пад на индустриското производство и пораст на цените низ целиот континент.
Зборувајќи на пленарната сесија на Руската недела на енергија во Москва, Путин истакна дека постапките на западните политички елити „ја уништија глобалната енергетска инфраструктура“, нагласувајќи дека политичкиот притисок довел до ирационални одлуки во ЕУ, според западните медиуми.
„Многу европски земји, под политички притисок, одбија да купуваат руски енергетски производи. Веќе неколку пати предупредив за последиците – не за Русија, туку за самите тие земји. Гледаме пад на индустриската активност и пораст на цените поради поскапата нафта и гас од странство“, рече Путин.
Тој додаде дека, по забраната за соработка со Русија, западните компании почнаа да ја губат својата технолошка предност и да го намалуваат производството, додека руските експерти станаа „технолошки лидери“ на пазарот.
„Што направија? Купија билет и не патуваа – само за да се налутат на кондуктерот. Каква глупост.
Нашиот енергетски систем е еден од најголемите во светот. Овој огромен комплекс работи сигурно и ефикасно“, заклучи претседателот на Русија.
Свет
Кремљ: Путин го предупреди Трамп за време на разговорот

Во денешниот телефонски разговор, рускиот претседател Владимир Путин го предупреди американскиот претседател Доналд Трамп дека испраќањето крстосувачки ракети „Томахавк“ во Украина ќе го загрози мировниот процес и ќе им наштети на односите меѓу САД и Русија. Веста беше потврдена од Кремљ во официјално соопштение, пренесуваат медиумите во регионот.
Според Кремљ, Путин изразил загриженост поради можноста напредното американско оружје во рацете на украинските сили да доведе до понатамошна ескалација на конфликтот. Предупредувањето јасно посочи дека таков потег од страна на Вашингтон би имал директни негативни последици врз билатералните односи на двете сили.
Советникот на Путин, Јуриј Ушаков, им изјави на новинарите дека Путин во разговорот нагласил дека руските сили во моментов имаат „целосна стратешка иницијатива“ по целата линија на фронтот во Украина.
Ушаков додаде дека денешниот повик, кој траел речиси два и пол часа, бил инициран од руска страна. Тој, исто така, објави дека на планираниот нов самит меѓу двајцата претседатели ќе му претходи разговор меѓу државниот секретар на САД, Марко Рубио, и рускиот министер за надворешни работи, Сергеј Лавров, кој се очекува да се одржи во наредните денови, пренесува index.hr.
Фото: принтскрин
Свет
Орбан по разговорите Трамп-Путин: Голема вест за мирољубивите луѓе, подготвени сме

Американскиот претседател Доналд Трамп објави дека наскоро повторно ќе се сретне со рускиот претседател Владимир Путин, а овој пат средбата ќе се одржи во Будимпешта. Двајцата лидери се согласија за нов самит за време на телефонски разговор.
Унгарија е подготвена да биде домаќин на самитот Русија-САД, изјави унгарскиот премиер Виктор Орбан.
„Планираната средба меѓу американскиот и рускиот претседател е голема вест за мирољубивите луѓе низ целиот свет. Подготвени сме!“ напиша тој на X.
Трамп и Путин последен пат се сретнаа пред два месеци во Алјаска, но таа средба не донесе конкретен напредок кон мирот во Украина, по што следеше период на дипломатско затишје меѓу Вашингтон и Москва, анализираат медиумите.
Денешниот телефонски повик не беше објавен со денови, за разлика од некои претходни, а аналитичарите истакнуваат дека времето на неговото случување е исклучително значајно. Имено, Трамп утре треба да се сретне со украинскиот претседател Володимир Зеленски.
Клучната тема на нивниот разговор ќе биде можното испраќање американски ракети со долг дострел „Томахавк“ во Украина, што би претставувало значително зголемување на воената помош за земјата.
Фото: принтскрин