МВР, Јавното обвинителство и антикорупциската комисија заеднички ќе работат за решавање на случајот "Тајни банкарски сметки".

ПО ИНИЦИЈАТИВА НА АНТИКОРУПЦИСКАТА КОМИСИЈА

МВР, Јавното обвинителство и антикорупциската комисија заеднички ќе работат за решавање на случајот "Тајни банкарски сметки". Ова било договорено на средбите на антикорупциската комисија со претставници од МВР и со Одделот за борба против организираниот криминал и корупцијата во јавното обвинителство. Во документацијата за наводно извршени трансакции и тајни сметки во странски банки, што на комисијата пред Нова година и ги достави директорот на неделникот "Фокус", Никола Младенов, биле имињата на повеќемина македонски функционери, стопанственици и на претпријатија.

– Значајно е да се проверат информациите зашто станува збор за високи државни функционери и стопанственици. Случајот излегува надвор од надлежностите на комисијата бидејќи, за разлика од функционерите, стопанствениците немаат обврска да ја пријавуваат имотната состојба. Затоа е од големо значење сите надлежни институции да се вклучат во расчистувањето на случајот – вели Михајло Маневски, претседател на антикорупциската комисија.

На 23 декември лани Младенов на комисијата и достави три комплети од по пет копии за извршени трансакции и за сметки во повеќе банки и држави. Тој претходно на комисијата и доставил и копии од изводи на сметки во швајцарски банки што ги поседувале претседателот на државата, Бранко Црвенковски и поранешниот премиер Хари Костов. Поради содржината на документацијата, комисијата реши да им ги достави информациите на надлежните институции заради целосна и детална проверка.

– Договоривме мерки и активности што треба да се преземат и понатамошна соработка за проверка на информациите и утврдување на вистината заради целосно расчистување на случајот. Можно е во работата да се вклучат и други институции, како Управата за јавни приходи, финансиската полиција и Дирекцијата за спречување перење пари – вели Маневски. (Н.Н.С.)