Владата остава простор да ги манипулира граѓаните, да ги прекршува нивните права и да ги дискриминира, вели Мирјана Најчевска, претседателка на Хелсиншкиот комитет за човекови права, за измените во Законот за јавни собири

Сунчица Стојановска

Владата остава простор да ги манипулира граѓаните, да ги прекршува нивните права и да ги дискриминира, вели Мирјана Најчевска, претседателка на Хелсиншкиот комитет за човекови права, за измените во Законот за јавни собири, со кои пратеници од власта предлагаат да се ограничат местата каде што граѓаните во иднина ќе протестираат.

– Владата може да ги дозволи собирите што и одговараат и да ги забрани собирите или протестите што не и одговараат. Одредбите во предлогот се непрецизни. Власта може произволно да решава кој собир е дозволен, а кој забранет и да ги дискриминира граѓаните при примената на законот – вели Најчевска.

Според неа, обврска на државата е да најде алтернативни патишта доколку некои се блокирани, наместо да ги ограничува граѓаните каде да изразуваат незадоволство.

Народниот правобранител Иџет Мемети допрва ќе разгледува дали со ваков закон власта ги загрозува правата на граѓаните. Тој уште не го разгледал предлог-законот за јавни собири.

Пратениците од владејачкото мнозинство ќе го поддржат предлогот.

– Ова е најдобриот можен закон за овој момент, ако не сакаме анархија и дестабилизација. Блокадите ми пречат и мене и на другите граѓани. Ако некои сили во Македонија се за анархија, не знам колку ја сакаат сопствената држава – изјави Хусеин Хусеинџевад, пратеник од ДУИ.

ВМРО-ДПМНЕ најави иницијатива пред Уставниот суд ако Собранието го донесе овој закон вака како што го предложи Владата.

– Власта предлага да се протестира на места без значење. Со тоа ги омаловажува граѓаните, кои ќе треба да се собираат во ливади и на паркинзи – изјави Илија Србиновски од ВМРО-ДПМНЕ.

Доколку пратениците го изгласаат предлогот за јавни собири, граѓаните нема да смеат да протестираат пред Владата, пред Собранието, на магистралните патишта и на важни сообраќајници, во близина на училишта, болници, градинки и на други места што би можеле да ги попречат слободното движење и работа на граѓаните.

Според Уставот, граѓаните имаат право мирно да се собираат и да изразуваат јавен протест без претходна најава и без посебна дозвола.

Зошто Станковска го повлече својот потпис?

Славица Станковска, пратеничка на СДСМ, го повлече потписот од предлог-законот на кој се потпишани уште четворица пратеници од владејачкото мнозинство. Таа изјави дека не се потпишала на ваков предлог бидејќи била во странство.

Иван Анастасовски од СДСМ вели дека ќе гласа „за“, иако има дилема по постапката на Станковска. 

– Јас и летово гласав за овој предлог, ќе гласам и сега. Од друга страна, останува сомнежот зошто еден од предлагачите го повлече својот потпис. Овој закон е потребен, но треба јасно да се дефинираат правилата каде и како ќе се протестира – вели Анастасовски.

Роза Топузовска – Каревска од ЛДП изјави дека не верува оти некој друг се потпишал наместо Станковска.