Не треба да се пополнуваат заканувачките анкетни ливчиња што ги испратија општините и внесоа конфузија во јавноста

Не треба да се пополнуваат заканувачките анкетни ливчиња што ги испратија општините и внесоа конфузија во јавноста

Законска обврска за пријавување имаат само граѓаните кои првпат се стекнале со имот или чија имотна состојба се променила по стапувањето во сила на Законот за данок на имот, односно од 21 септември 2004 година, а не била досега евидентирана во УЈП

Нина Нинеска Фиданоска

Граѓаните немаат никаква обврска да ги пополнуваат евиденциските листи што деновиве им беа испратени од локалните власти, ниту мораат да ги доставуваат до општините. Ова вчера категорично го порача народниот правобранител Иџет Мемети во врска со случајот "Даночни анкетни листи", кои општинарите ги лиферуваа до голем број граѓани, во обид, како што соопштија, да ја комплетираат базата на податоци. Народниот правобранител, кој всушност е адвокат на граѓаните, вчера застана целосно на нивна страна, потенцирајќи дека општинските власти со испраќање на евиденциските листови ги доведуваат во заблуда, врз нив вршат притисок и покажуваат некоректен однос, ставајќи ги во улога на сервис на јавната администрација, наместо да биде спротивното.

Овој случај веќе неколку дена ја бранува јавноста и ги збунува граѓаните, кои беа максимално изреволтирани од последниот потег на градските татковци.

Народниот правобранител јасно потенцира дека никој не е должен да го пријавува веќе пријавениот имот. "Законската обврска за пријавување на имотната состојба произлегува само за граѓаните кои првпат се стекнале со имот или чија имотна состојба се променила по стапувањето во сила на Законот за данок на имот, односно од 21 септември 2004 година, а не била досега евидентирана во Управата за јавни приходи", се наведува во соопштението кое оваа институција вчера го испрати до медиумите.

Од Канцеларијата на народниот правобранител истакнуваат дека граѓаните кои веќе биле евидентирани како даночни обврзници во УЈП врз основа на данок на имот, а кај кои не настапила промена во имотната состојба, немаат законска обврска за повторно пријавување на имотната состојба. Тоа е во согласност со член 29, став 2 од Законот за даноците на имот, во кој е наведено дека обврзникот на данокот на имот кој поднел даночна пријава, нема обврска за истиот имот да поднесе нова пријава, доколку нема промени на податоците содржани во претходно поднесената даночна пријава, а кои се од влијание за висината на даночната обврска.

Законска обврска на секој граѓанин е да ја пријави имотната состојба најдоцна до 31 јануари во годината во која се утврдува данокот, како и секоја промена на својата имотна состојба до општинската администрација, но само за оние што досега не биле евидентирани како даночни обврзници.

"Според тоа, доставувањето евиденциски листови до граѓаните содржат само дел од законските одредби, со што тие се доведуваат во заблуда, не се сметаат за даночна пријава, ниту граѓаните се должни да ги пополнат и да ги достават до општините, односно до Градот Скопје. Единиците на локалната самоуправа се должни да водат регистар на недвижниот и подвижниот имот, а досегашните податоци да ги преземат по службена должност од УЈП. Затоа, доставувањето евидентни листови и извадоци од казнените одредби на законот до граѓаните, народниот правобранител го смета за некоректен однос и притисок врз нив од страна на јавната администрација, која наместо да биде нивен сервис, граѓаните ги става во улога на сервис на јавната администрација", вели народниот правобранител, додавајќи дека општините не може да се издигнуваат над законите.