Проектот „Добри вести“ на агенцијата „Наша фабрика“ најверојатно завршува. Зоран Јачев нема повеќе да биде претседател на невладината организација „Транспарентност“.

Проектот „Добри вести“ на агенцијата „Наша фабрика“ најверојатно завршува. Зоран Јачев нема повеќе да биде претседател на невладината организација „Транспарентност“.

Ова е досегашниот епилог од аферата со тајниот проект на Владата и на „Наша фабрика“ за подобрување на имиџот на власта, во кој беа инволвирани неколку активни новинари.

Останува отворено прашањето за тоа кој и кога одлучил да го финансира овој проект и со кои пари. Ако се работи за буџетски пари, тогаш се поставува уште едно прашање: врз основа на кои критериуми е избрана токму оваа агенција. Што се однесува до Здружението на новинарите и Судот на честа на ова здружение, се уште нема никаква реакција. Во меѓувреме, продолжуваме да објавуваме уште детали од препораките на тимот од „Наша фабрика“ за, на пример Министерството за труд и социјала. Во екот на кризата со протестите на стечајците од Штип и мод Куманово во јануари годинава, експертите на „Наша фабрика“ му упатиле и ваква препорака до кабинетот на Стефче Јакимовски: „Од клиентот (Министерството за труд и социјала – н.з.) ни се потребни информации за сите стечајци, посебни стечајни групи, нивните специфични барања и што Владата може да направи во наредниот период за некои од нив.

Потребни ни се податоци за тоа колку стечајци остваруваат некакви права и надоместоци, какви се бенефиции им се дадени и колкави средства се трошат за таа намена. Да се истакнат некои апсурдни примери на некои стечајци што би ги пополниле насловните страници и би го свртеле вниманието на друга страна (на пример, некои злоупотреби, огромните надоместоци на првите стечајци итн)“.

За изборот на фирми во итни случаи, како што беше изборот на „Наша фабрика“ како најповолен понудувач за организирање на прославата на кандидатскиот статус на Македонија во ЕУ, во Владата велат дека тоа се врши врз основа на нивната база на податоци. Тоа е своевиден регистар на генералниот секретаријат на Владата на фирми по дејности, каде што за секоја фирма има своевидна „лична карта“, објаснуваат од Владата. За прославата за одбележување на кандидатскиот статус, Владата, како што веќе е објавено, собрала три понуди: од „Гејзер“, „Кино око“ и „Наша фабрика“. За најповолна била избрана понудата на „Наша фабрика“.

– Според информациите од стручните служби, за изборот на трите компании пресудни биле финансискиот и сценско-организацискиот критериум. Според информациите од стручните служби зад предлог-сценариото за прославата на кандидатскиот статус стои името на познатиот режисер Александар Поповски од фирмата „Наша фабрика“, што гарантирало успешно осмислен и изведен хепенинг – изјави владиниот портпарол Сашо Чолаковски на прашање на „Време“ кои биле критериумите токму од трите фирми – „Гејзер“, „Кино око“ и „Наша фабрика“ – да се побараат понуди. „Наша фабрика“ е регистрирана во мај 2005 година.

Екипа на „Време“

Јачев ќе се збогува со претседателската функција во „Транспарентност“

Во „Транспарентност Македонија“ претстои освежување на организацијата и на телата, во текот на кои најверојатно ќе биде „реконструиран“ актуелниот претседател Зоран Јачев, дознаваме од  наши извори.

Во оваа организација, која е дел од „Транспарентност интернешнел“, во тек е втората редовна ревизија, по што ќе се свикаат собранието на основачите и другите органи.

Официјалниот повод за промената на чело на оваа невладина организација, велат од таму, сепак не се последните споменувања на нејзиниот претседател Јачев во врска со проектот „Фабрика“ и ангажирањето новинари во агенцијата што работела за Владата, туку редовните статутарни активности.