Само ако Јавното правобранителство најде и достави нови докази за случајот „Бачило“, целата постапка може да се повтори, објаснуваат судските експерти за случајот со скандалозната отштета од 730. 000 евра.

Мери Јордановска

Само ако Јавното правобранителство најде и достави нови докази за случајот „Бачило“, целата постапка може да се повтори, објаснуваат судските експерти за случајот со скандалозната отштета од 730. 000 евра. Правобранителството има законски рок од пет години по донесувањето на пресудата да поднесе барање за повторување на постапката до првостепениот суд.

Експертите тврдат дека предметот „Бачило“ два пати можел да се најде пред Врховниот суд. Првиот пат таква можност имало Јавното обвинителство во 2003 година, кога правобранителството барало заштита на законитоста за случајот. Тогаш обвинителството не утврдило дека со правосилната судска пресуда бил повреден законот. Вториот пат, тоа можел, а не го сторил заменик-јавниот правобранител Миодраг Стевановиќ, кој можел да бара од Врховниот суд да ја преиспита постапката. Со тоа, тврдат судски извори, одговорноста за случајот еднакво ја носат правобранителството, обвинителството, скопскиот Основен суд 1 и Апелацискиот суд, кој ја одбил жалбата на правобранителството и ја потврдил меѓупресудата на основниот суд. Наодите на антикорупциската комисија покажуваат дека најсомнителна во целиот случај е исплатата на каматата што течела од денот кога се случил инцидентот. Во судската практика непишано правило е дека каматата тече од денот на пресудувањето.

Во документите што завчера ги откри Државната комисија за спречување на корупцијата има скандалозни наоди за случајот „Бачило“. Според нив, Душан Стојанов, потпоручник од полициската станица Шар планина еден ден по инцидентот што се случил на 27 јуни 2001 година направил увид во бачилото, но не го фотографирал. Во службената белешка на Стојанов пишувало: „Објектот е видно оштетен во просториите каде што се прави и чува сирењето. На двесте метри од бачилото се гледа кратер од поголем размер а околу него се расфрлани телата на поголем број овци. По кажување на оштетениот, во објектот имало 2.000 канти сирење, усмртени се 280 овци и 50 се со видливи оштетувања без можност да преживеат. На источниот дел од објектот има 8 трупа коњи, а усмртени се и четири ждребиња“.

Како потврда дека инцидентот навистина се случил, до судот биле доставени изјавите на тројца овчари-сведоци, како и потврда од ветеринарната станица „Еуровест“ од село Камењане, од каде што потекнува Иснифарис Џемаили.

Во целиот случај, нејасно е како од пријавени 320 овци, 8 коњи и четири ждребиња, бројката се качила на 929 овци, 31 коњ и четири ждребиња, кога во ниту едно од трите вештачења не бил утврден бројот на загинатиот добиток, ниту пак количеството на загубеното сирење.

Во извештајот на АРМ се вели дека на критичниот ден нивните хеликоптери не биле вооружени и вршеле само транспорт и замена на персоналот на позициите на Попова Шапка. Сите овие наоди носат сомнеж дека целиот случај е исконструиран, а неизвесно останува дали само тетовецот Иснифарис Џемаили ги зел парите од отштетата. Познато е дека парите, како што стои во судското извршено решение, биле исплатени на жиро-сметката на Иснифарис Џемаили во Извозно-кредитна банка.

Сите наоди за случајот „Бачило“ комисијата завчера ги поднесе до Врховниот суд, Републичкиот судски совет и до Владата од каде што се чека одговор.