Министерот за внатрешни работи Љубомир Михајловски е убеден дека целата работа околу новите пасоши ќе биде готова до крајот на годинава кога е и крајниот рок и дека нема да се доцни, а како потврда на тоа во јуни ќе го покажел првиот нов пасош

ЏАНГО АМБИЦИОЗЕН

Министерот за внатрешни работи Љубомир Михајловски е убеден дека целата работа околу новите пасоши ќе биде готова до крајот на годинава кога е и крајниот рок и дека нема да се доцни, а како потврда на тоа во јуни ќе го покажел првиот нов пасош

Министерот за внатрешни работи Љубомир Михајловски – Џанго вчера вети дека првиот нов пасош ќе го покаже во првата половина на јуни. Тој повторно ја убедуваше јавноста дека не се пробиени роковите за изработувањето на новите лични документи.

"Во јавноста се шират многу шпекулации дека се доцни со новите патни исправи. Затоа ќе повторам дека рокот е крајот на 2006 година и до тогаш ќе ги имаме новите пасоши. Несериозно е сега да кажувам точни датуми и часови кога ќе биде завршена работата со новите пасоши, но роковите ќе бидат запазени. Во првата половина на јуни ќе ви го покажам првиот нов пасош", рече вчера министерот Михајловски по завршувањето на одбележувањето на 7 Мај, Денот на полицијата во Скопје.

Михајловски побара од јавноста да не шпекулира ниту околу цената на новите пасоши која се уште не е позната.

"Цената на новите патни исправи се уште не е позната и дополнително треба да се разговара за неа и да се утврдува. Но, ве уверувам дека нема да биде висока, туку ќе биде достапна за сите", речи Михајловски.

До пред само неколку недели на адреса на македонското МВР стигнуваа обвинувања дека на големо се доцни со изработката на пасошите и дека победникот на тендерот нема да може да ги запази утврдените рокови. Обвинувањата беа дека работата толку многу заглавила што се уште не бил екипиран експертскиот тим и се уште се поставувала основната опрема.

МВР веднаш ги демантираше обвинувањата со тоа дека се тече според плановите и дека новите пасоши ќе бидат готови до крајот на годината кога е и крајниот рок.