Службеното лице нема да одговара според Кривичниот законик, ако не е предвидена одговорност во некој друг закон за неговиот делокруг на работа и за работните обврски.

НАМЕНСКА ИЗМЕНА НА ЗЛОУПОТРЕБАТА НА СЛУЖБЕНАТА ДОЛЖНОСТ И ОВЛАСТУВАЊАТА

Службеното лице нема да одговара според Кривичниот законик, ако не е предвидена одговорност во некој друг закон за неговиот делокруг на работа и за работните обврски.

 Ова, според правните експерти ќе биде резултат од набрзина и без никаква расправа изменетиот член 353 од КЗ во петокот, по амандман од пратеникот од ВМРО-Народна Жарко Караџоски.

"Ако со посебен закон не се предвидени санкции за конкретните кривични дела што ги сториле Војо Михајловски, Ламбе Арнаудовски, Владислав Тамбурковски или Драган Даравелски, додека биле на функциите, со најновата измена на членот за злоупотреба на службената положба и овластувањата, во овие актуелни случаи кривични дела – нема!", заклучуваат судиите и другите правни експерти што ги консултиравме. Според нив, ублажувањето за злоупотребата ќе важи за сите осомничени, обвинети и осудени функционери, чии пресуди не се правосилни, односно чии постапки не се завршени.

Пратеникот Ефтим Манев од ВМРО-ДПМНЕ вчера изјави: "Измената на овој член е наменска, мислам дека се работи за одреден број лица кои кривично се гонат, тече судење или се осудени, или се идни што треба да се гонат. ВМРО-Народна за ова се договори со СДСМ". Според него, со амандманот се дава една помека форма при утврдувањето на една службена одговорност. "Фактички, доколку не е предвидена одговорност во некој друг закон за неговиот делокруг на работа службеното лице нема да одговара според КЗ. Сметам дека треба поконкретна измена во Законикот за овој член. Одредбата не е доволно дефинирана, таа е уште од социјалистичкиот систем. Во повеќе европски закони под злоупотреба на службената положба и овластувањата прецизирани се кривичните дела. Кај нас не ќе може да се чепкаат одредбите за ова кривично дело се додека не се подготват измени, односно замена на членот 353, каде делата ќе бидат доволно дефинирани. Вака како што се оди сега, голем дел од службениците нема да одговараат за својот домен на работа, ако направат повреда на законот", вели правникот Манев, кој вчера беше револтиран дека на листингот стои дека и тој позитивно гласал за амандманот со кој не се согласува. Тој тврди дека во моментот на гласањето бил надвор од салата и дека ниту од ВМРО-ДПМНЕ, ни од Либерална партија немало пратеник внатре. "Некој го притиснал моето копче, но не можам да лоцирам кој од колегите што се во негова близина го сторил тоа. "Најблиску беше Михајло Георгиевски, а тој гласал ‘за’ за амандманот", рече Манев. И неговите сопартијци Ѓорѓе Паљошковски и Илија Србиновски вчера тврдеа дека некој го злоупотребил нивното отсуство од собраниската сала и позитивно гласал во нивно име за фамозниот амандман на Караџоски. (С.К.Д.)