Едно беспилотно летало набавено во времето на министерувањето на Љубе Бошковски се наоѓало во хангарите на МВР, а друго летало, иако било платено и регистрирано како сопственост на полицијата, МВР се уште не го презело од купувачот, тврдат високи полициски извори.

Александар Божиновски

Едно беспилотно летало набавено во времето на министерувањето на Љубе Бошковски се наоѓало во хангарите на МВР, а друго летало, иако било платено и регистрирано како сопственост на полицијата, МВР се уште не го презело од купувачот, тврдат високи полициски извори.

За овој случај во Основниот суд Скопје 1 со месеци се води судски процес во кој се обвинети Александар Цветков, поранешниот началник на одделението за оперативна техника на МВР, Николетка Митанова, поранешна советничка за финансии во тоа министерство, и Митко Кикереков, бизнисмен од Скопје. МВР и скопското обвинителство кривично ги гонат овие тројца дека наводно само фиктивно ја направиле набавката, односно дека леталата никогаш не биле донесени во земјава.

„Време“ дојде до фотографиите од двете спорни летала. На фотографијата на која е прикажано леталото тип „БЛЦ – 130“ (беспилотно летало модел Ц-130) јасно се гледа ознаката на „ФОП“. Леталото било склопувано во халите на скопската фабрика „МЗТ ФОП“. Ова летало веќе две години било во хангарите на МВР.

Второто летало, од типот „БЛЦ-100“, исто така било сопственост на МВР. Нашите извори наведуваат дека за него веќе биле регулирани сите документи. Сепак, леталото се наоѓало во една приватна скопска фабрика. Останува непознато зошто полицијата не сака да си го земе.

МВР одби официјално да го коментира случајот.

– Додека во судот се води постапка за тој случај, ние нема ништо да коментираме. Ако судот смета дека не држи обвинението, нека го отфрли – кратко одговори Горан Павловски, портпарол на МВР.

Во обвинението за беспилотните летала се вели дека Цветков и Митанова наводно подготвиле фиктивна документација за набавка. Во зделката учествувал и Кикереков, кој за своите услуги наплатил околу 64.000 евра. Во документот пишува дека од јуни 2001 до октомври 2002 година Цветков и Митанова го оштетиле МВР за повеќе од 500.000 евра. Митанова, по налог на Цветков, склучила договор со фирмата „Компакт М“ од Скопје за набавка на леталата „БЛЦ-100“ и „БЛЦ-130“ во вредност од 420.000 евра. Околу 13 милиони денари биле исплатени, но леталата не биле испорачани, тврди обвинителството. Митанова не го раскинала договорот, туку го ангажирала „МЗТ-ФОП“ за изработка на леталата. Обвинителството смета дека Митанова и Цветков им наредиле на членовите на комисијата во МВР да го потпишат записникот како да ги примиле леталата. Тие потпишале и друг записник – дека едно летало паднало и било сосема уништено. Но, „МЗТ-ФОП“ не ја добиле втората половина од парите, туку Митанова преку цесии парите им ги префрлила на други шест фирми.

Полициските извори велат дека и овој дел од обвинението не држи затоа што во МВР постои записник за падот на леталото. Документот бил третиран како службена тајна.