По добивањето на новиот доказ од Обвинителството за повторување на постапката за отштетата од 720.000 евра

По добивањето на новиот доказ од Обвинителството за повторување на постапката за отштетата од 720.000 евра

Јавното правобранителство сега бара повторување на постапката

Гордана Дувњак

Јавното правобранителство на Македонија денес ќе поднесе предлог за повторување на постапката за "случајот Бачило". Предлогот утрово ќе биде доставен до Основниот суд Скопје 1, истиот оној суд кој ја донесе правосилната судска пресуда, со која државата се задолжи да му плати на контроверзниот Иснифарис Џемаили од Камењане над 720.000 евра како надомест за штета за наводното рекетирање на бачило за време на воениот конфликт во 2001 година. Доколку во меѓувреме судијката Снежана Попчевска не биде разрешена од судиската функција поради нестручно и несовесно постапување за истиот предмет, како што предлага Републичкиот судски совет, голема е веројатноста "случајот Бачило" повторно да се врати во рацете на истата судијка. Тоа нема да се случи и во случај некоја од странките во постапката, а тоа се Јавното правобранителство и тужителот, да побара изземање на Попчевска. Токму околу одговорноста на споменатата основна судијка од "единица" денес ќе расправа и Општата седница на Врховниот суд, која треба да изгради мислење, кое потоа ќе му биде доставено на РСС за да изгради конечен став.

Јавното правобранителство на Македонија во текот на вчерашниот ден го разгледуваше предметот "Бачило" и одлучи да го даде на натамошно судско процесуирање. Клучен доказ во новиот судски процес ќе биде фалсификуваната потврда за загинатиот добиток што ја издал ветеринарот од Камењане Мухамед Арифи, што ќе се смета и за нов доказ во постапката. Изјавата на Арифи е содржана во записникот за текот на досегашната истрага за "Бачило", кој Јавното правобранителство го доби од Обвинителството, во кое сведокот потврдува дека издал лажен документ без увид на самото место. Ветеринарот од Тетовско, кој и самиот ќе биде кривично гонет, во текот на истрагата тврдел дека не му било познато зошто ќе се користи спорниот документ. Од страна на Џемаили нему му било кажано дека документот се бара заради добивање концесија за користење пасиште, но не и за судски процес.

Државниот јавен обвинител на Македонија, Александар Прчевски, во последната изјава за "Утрински весник" кажа дека ова не е крај на истрагата за "Бачило" и оти ќе се продолжи и натаму, с? до целосното расветлување на целиот случај.

Обвинителството, сепак, процени дека во овој момент понудиле нови докази за да може Јавното правобранителство да предложи повторување на судската постапка.