Познатото гевгелиско казино „Југо“, сега „Аполонија казино“, понудено е за продажба на официјална лондонска берза за цена од два милиони евра и покрај привремената судска забрана за отуѓување на имотот, дознава „Време“.

И ПОКРАЈ СУДСКАТА ЗАБРАНА ЗА ОТУЃУВАЊЕ НА ИМОТОТ

Познатото гевгелиско казино „Југо“, сега „Аполонија казино“, понудено е за продажба на официјална лондонска берза за цена од два милиони евра и покрај привремената судска забрана за отуѓување на имотот, дознава „Време“. Продажбата на казиното е понудена на официјалната веб страна на „Казинос оф Мајфаир“. Во понудата е наведено дека станува збор за лиценцирано казино изградено во 1982 година со површина од 4,100 квадратни метри и дека има 120 соби. Цената што е понудена на веб страната е 2.210.000 евра. На истата веб-страница се продава и уште едно казино од Македонија, за цена од 1,5 милион евра. Според информациите на „Време“, станува збор за казиното „Хит“.

Со одлука на гевгелискиот Основен суд во октомври 2005 година изречена е привремена мерка за забрана за отуѓување на имотот на „Аполонија казино“ и тој е ставен под хипотека. Со мерката треба да се обезбеди паричното побарување на државата Македонија, која е оштетена за 18 милиони евра затаен данок.

Управата на „Аполонија казино“ вчера не беше достапна за коментар.

Случајот со казиното „Југо“ претставува најголемо откриено затајување данок во Македонија.

Затајувањето е откриено во 2003 година по упад на агентите на Управата за безбедност и контраразузнавање во домот на Драган Стошиќ, кој заедно со Швеѓанецот Ларс Клинг е еден од сопствениците на казиното. Во подрумот на Стошиќ тогаш беше пронајдена огромна документација за двојно книжење на приходите на казиното од која потоа Управата за јавни приходи утврди дека од 1996 до 2003 година сопствениците затаиле данок од 18 милиони евра.

Доброупатени извори и помали акционери во казиното тврдат дека цената од 2,2 милиони евра за продажба на имотот на „Аполонија казино“ е смешна. Тие велат дека казиното вреди најмалку 15 милиони евра.

– Казиното остварува чист профит меѓу 8 и 10 милиони евра годишно. Понудената сума е апсурдна. Тоа е само доказ дека сопственикот сака преку продажба на казиното на друга фирма да се ослободи од одговорноста пред обновувањето на постапката за затајувањето на данокот – тврдат изворите.

Неофицијално, сопственикот Ларс Клинг се подготвува казиното да го продаде на фирма во сопственост на неговата ќерка и затоа понудил ниска цена на лондонската берза.

Клинг и Стошиќ во септември 2003 беа уапсени на граничниот премин Богородица при обид да прошверцуваат 160.000 евра, но набргу беа пуштени да се бранат од слобода. Во сомнителна судска постапка на основниот велешки суд прво беше ослободен од обвинението Ларс клинг, а во април годинава од обвинение за затајување данок беше ослободен и Стошиќ.

Судската постапка за затајувањето на 18 милиони евра данок се најде во црниот тефтер за македонското судство што го водеше поранешниот американски амбасадор Лоренс Батлер

Во јули годинава Јавното обвинителство од Гевгелија поднесе жалба до Апелацискиот суд за повторување на постапката против двајцата сопственици на „Аполонија казино“. Одлуката се уште не е донесена, но судски извори тврдат дека преку политички врски се вршеле притисоци жалбата на Обвинителството да биде отфрлена.

При откривање на документацијата за двојното книжење на приходите, агентите на ДБК пронашле и таен тефтер со имиња на високи функционери, политичари, судии и обвинители, како и висината на сумите што казиното секој месец им ги исплаќало за подмитување. Тефтерот се чува во најстрога тајност и се наоѓа во рацете на мал круг на луѓе.

Е.З.