Свет
Барак Обама ја доби Нобеловата награда за мир

Американскиот претседател Барак Обама ја доби Нобеловата награда за мир, денеска, за „давање надеж за подобра иднина“ на светот, со неговата мировна работа и повикот за намалување на нуклеарното оружје на глобално ниво
Норвешкиот Комитет за доделување на Нобел го награди Барак Обама за неговите извонредни напори за зацврствување на меѓународната дипломатија и соработката меѓу луѓето. Првиот Афроамерикански претседател на САД, Обама, повика за разоружување и работеше на процесот на продолжување на преговорите за мировниот процес на Средниот Исток.„Многу ретко се појавува човек што како Обама го добива целокупното внимание на светот, како и неговата способност да им даде надеж на сограѓаните за подобра иднина“, рекоа од Комитетот. Обама е награден со Нобел за помалку од девет месеци работа како претседател на САД. Покрај амбициозната меѓународна агенда, нему му останува да поентира на Средниот Исток и во Иран во врска со програмата за нуклеарно оружје, како и да се соочи со проблемите од војната во Авганистан.
Минатиот месец Обама беше домаќин на историскиот состанок на Советот за безбедност на Обединетите нации, каде беше одобрена резолуцијата на САД со која се повикува на глобално уништување на арсеналот нуклеарно оружје.Обама е третиот американски демократ кој добива Нобелова награда во последните десет години по поранешниот заменик-претседател Ал Гор, кој доби Нобел во 2007 година со програмата пред Обединетите нации за климатски промени и Џими Картер во 2002 година.Наградата вредна 10 милиони шведски круни (1,4 милиони долари) ќе му биде предадена на Обама во Осло на 10 декември.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
САД почнаа да ги наплаќаат новите царини на Трамп од 10%

Американските царински службеници почнаа да ја наплаќаат едностраната царина од 10 отсто на претседателот Доналд Трамп за сите увозни производи од многу земји, а повисоките давачки за стоките од 57 главни трговски партнери треба да започнат следната недела.
Меѓу земјите кои први беа погодени од царината од 10 отсто се: Австралија, Велика Британија, Колумбија, Аргентина, Египет и Саудиска Арабија.
Во среда треба да стапат во сила повисоките „реципрочни“ царини на Трамп од 11% до 50%.
Увозот во Европската унија ќе биде погоден со царини од 20 отсто, додека кинеската стока ќе биде погодена со царини од 34 отсто, со што вкупниот износ на новите царини на Трамп за Кина ќе достигне 54 отсто.
Канада и Мексико се ослободени од најновите царини на Трамп, бидејќи тие сè уште подлежат на царина од 25 отсто поврзана со американската криза со фентанил за стоки што не се во согласност со правилата за потекло меѓу САД, Мексико и Канада.
Американскиот претседател ги исклучи стоките како челик и алуминиум, автомобили, камиони и автоделови од ова, бидејќи тие подлежат на специјални царини за национална безбедност од 25%.
Неговата администрација, исто така, објави список со повеќе од 1.000 категории производи ослободени од тарифи. Ова го вклучува увозот на сурова нафта, нафтени деривати и други енергетски производи, фармацевтски производи, ураниум, титаниум, дрва и полупроводници и бакар, чија вредност се проценува на 645 милијарди долари увоз во 2024 година.
Свет
Бројот на загинати во земјотресот во Мјанмар се искачи на 3.354 лица

Бројот на загинати во земјотресот во Мјанмар се искачи на 3.354, додека 4.850 лица се повредени, а 220 се водат како исчезнати, јавија утринава локалните медиуми.
Во исто време, шефот за хуманитарна помош на ОН, Том Флечер, ја пофали работата на хуманитарните организации и организациите во заедницата кои водат одговор на ситуацијата со земјотресот.
Според ОН, повеќе од една третина од населението на Мјанмар сега има потреба од хуманитарна помош.
Флечер вчера беше во Мјанмар, во вториот по големина град Мандалај, кој се наоѓа во близина на епицентарот на земјотресот.
Земјотрес со јачина од 7,7 степени според Рихтеровата скала го погоди Мјанмар на 28 март, а епицентарот се наоѓал на околу 16 километри од Мандалеј, вториот по големина град во земјата.
Уништени се згради во неколку градови и населени места, вклучувајќи железнички и патен мост на автопатот Јангон-Мандалај.
Се случи и силен последователен потрес од 6,4 степени според Рихтеровата скала.
Свет
Полска ја затвора вратата; „Не им верувајте на Путин и Лукашенко, тие ве лажат“

Полскиот премиер Доналд Туск денеска најави „информативна кампања“ во седумте земји од кои доаѓаат повеќето мигранти за да ги спречат да влезат во Полска преку Белорусија.
Поради оваа миграција, која, по Варшава, беше оркестрирана од Минск и Москва, на крајот на март, Полска го ограничи правото на азил на странците по пристигнувањето на границата со Белорусија.
Туск исто така рече дека „илјадници војници, граничари и полицајци, камери и дронови го следат секој метар од границата 24 часа на ден“.
Туск не прецизираше во кои земји ќе се одвива „информативната кампања“ што ја најави.
Најголем дел од мигрантите кои сакаат да влезат во Полска се од Блискиот Исток и Африка.
„Нашата порака ќе биде едноставна: полската граница е затворена! Не им верувајте на шверцерите, не верувајте му на белорускиот претседател Лукашенко, не му верувајте на Путин! Ве лажат кога велат дека ова е патот до Европа. Тоа не е точно! рече Туск.
Според полските граничари, повеќе од 30.000 луѓе се обиделе илегално да ја преминат границата со Белорусија во 2024 година.
Полска постави метална гранична ограда висока пет метри со софистицирани уреди за надзор и распореди илјадници војници по неа.