Владата на Хондурас најпосле попушти под меѓународниот притисок и се согласи соборениот претседател Зелаја да се врати на претседателската функција до истекот на неговиот мандат, пренесе Reuters

По повеќемесечната политичка криза и повеќето пропаднати преговори, владата на Роберто Мичелети попушти откако минатава седмица имаше средба со неколку американски функционери.Претседателот Мануел Зелаја беше соборен од власта во април а од септември кога илегално се врати во државата, престојуваше во бразилската амбасада. Зелаја ќе може да се врати на претседателската функција по гласањето во Конгресот кое ќе биде потврдено од Уставниот суд. Мичелети изјавил дека мора да се истражат случувањата од последните неколку месеци,без да објасни што тоа значи.САД, Европската Унија и претседателите на државите од Јужна Америка инсистираа на Зелаја да му биде дозволено довршување на мандатот, и се заканија дека доколку не се спроведе легалната процедура до новите избори, тие нема да ја признаат новата власт и ќе ја блокираат земјата. Зелаја претходно двапати се обиде да се врати во Хондурас откако беше насилно симнат од власта со воен удар на 28 јуни годинава и од страна на војската протеран од Хондурас. Неговите приврзаници од неговото симнување од власта секојдневно протестираа. Исто така, пропадна и обидот за меѓународно посредување кое кон крајот на јули го предводеше претседателот на Костарика, Оскар Ариас. Тогаш владата на Мичелети одби да му ја предаде привремено власт на Зелаја кој требаше да ја предводи владата на национално единство за подготовка на новите избори. Мичелети беше упорен дека изборите ќе се одржат според предвиденото – на 29 ноември.Кризата почна откако Зелаја го разреши началникот на војската, генералот Ромео Васкез, бидејќи одби да му помогне да организира референдум за можноста претседателите да служат подолго од еден четиригодишен мандат. Инсистирањето на Зелаја, кој важи за сојузник на контроверзниот претседател на Венецуела, Хуго Чавез, да го промени уставот за да си овозможи уште еден мандат ги подели и институциите во земјата и доведе до уставна криза.Зелаја дојде на власт во 2006 г. и неговиот мандат требаше да трае до 2010 г. Инаку Зелаја е богат деловен човек кој потекнува од десната Либерална партија, кој по стапувањето на претседателската функција се доближи на левите идеи и воспостави блиска соработка со венецуелскиот претдедател и ултралевичар Чавез.