Свет
Забавена сојузничката офанзива во Авганистан
Авганистанските власти ги обвинуваат талибаните дека ги користат цивилите како жив ѕид за да се заштитат и да го забават напредувањето на меѓународните сили и авганистанските војници во офанзивата во Хелманд
„Земаа повеќе цивили како заложници. Ги ставаат жените и децата на покривите од куќите и оттаму пукаат заштитени со цивилите“, изјавил генералот Мохаидин Гори, командант на авганистанските војски во офанзивата Муштрак (Заедно).Оваа тактика кој е проследена со поставувањето бомби од домашно производство во околината на Муџрах, главниот град на покраината Хелманд, главно упориште на авганистанските талибани, според генералот Гори ја забавило офанзивата.„Талибанските мини и стравот од цивилни жртви го отежнува нашето движење“, додал Гори за странските новинари.Според полковникот Мохамад Саревар, офицер на авганистанското воено разузнавање, еден од најголемите проблеми на сојузничките војски е што талибаните ги користат цивилите за нивна заштита. Операцијата на заедничките трупи на Авганистан и на НАТО беше најавена две седмици однапред, што требаше да има ефект брз колебливите бунтовници и врз локалното население да се евакуира за да се избегнат цивилни колатерални жртви и да не бидат жив ѕид на талибаните.И командата на НАТО и командата на авганистанската армија пред почетокот на офанзивата најавија дека еден од приоритетите ќе биде избегнувањето на цивилните жртви. Инаку, во неделата дванаесет цивили беа убиени во ракетан напад на НАТО и авганистанската армија. Две ракети чија цел била талибанска позиција во Маџрах експлодирале на околу 300 метри од гаѓаното место, при што во регионот Над Али загинаа 12-те цивили. Откако британските хеликоптерски единици неколку дена вршеа бомбардирање на талибанските позиции во Хелманд, првиот напад врз градот Маџрах со 80 илјади жители, го изведоа неколку илјади американски маринци и војници на НАТО. Веднаш по нив требаше да следи напредувањето на екипи кои треба да помогнат во воспоставување на јавните служби и власта во градот, за да се добие поддршка од локалното население. Американските аналитичари забележуваат дека талибаните засега не покажуваат знаци на вознемиреност, иако во Авганистан ќе бидат распоредени уште дополнителни 30 илјади странски војници. Напротив, тие ги проширија нападите до југот на земјата развлекувајќи ја поставеноста на меѓународните војски. „Бројката талибански борци се зголемува секој ден. Нема значење колку војска ќе испратат Американците, талибаните и натаму ќе продолжат со џихадот“, изјавил еден од нивните портпароли. НАТО има проценка дека бројката на бунтовниците од 400 во 2004 г. се зголемила сега дури на 30 илјади. Многу од бунтовниците се враќаат од Пакистан, каде се засолнуваат.Талибаните во сите авганистански провинции воспоставија паралелна власт, а нивните шеријатски судови побрзо ги решаваат споровите за земјата отколку авганистанските судови. Тие на своите борци им даваат поголеми плати од платите во авганистанската армија. Нивниот главен проблем е што не можат да регрутираат борци надвор од паштунската заедница кое е 40 отсто до вкупното население.Ричард Барет кој го води тимот на Обединетите нации за следење на талибаните и Ал Каеда, смета дека талибаните најверојатно дошле до крајните граници на нивното ширење, но истовремено стануваат и позбиено движење кое има командна структура од лидерот Мулах Мохамед Омар до командантите на теренот.Американските аналитичари велат дека претседателот Барак Обама доцни со стратегијата, која според нив е компромис меѓу барањата на командантите во Авганистан и она што домашната јавност може да го апсорбира без поголеми противења. Инаку, генералот Дејвид Петраус, автор на стратегијата применета во Ирак, изјави дека Авганистан ќе биде најкрвавата и најтешка војна која САД ќе ја водат по подолго време.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на НАТО: Кина сака добри односи со Западот и и помага на Русија, не може да ги има и двете
Кина мора да престане да ја поддржува руската војна во Украина ако сака да ужива во добри односи со Западот, изјави денеска генералниот секретар на НАТО Јенс Столтенберг, предупредувајќи го Пекинг со невообичаено остри зборови дека не може да ги има и двете. За време на посетата на Берлин, шефот на западната воена алијанса рече дека помошта на Пекинг е од витално значење за воените напори на Москва бидејќи ја зајакнува воената економија на Русија со споделување на врвна технологија, како што се полупроводниците.
„Минатата година Русија увезе 90 отсто од својата микроелектроника од Кина, која се користи за производство на проектили, тенкови и авиони. Кина исто така работи на Русија да и обезбеди подобрени сателитски способности“, рече Столтенберг. „Кина вели дека сака добри односи со Западот. Во исто време, Пекинг продолжува да го поттикнува најголемиот вооружен конфликт во Европа од Втората светска војна. Не може да ги има и двете“, предупреди тој.
Столтенберг ги предупреди западните сојузници да не станат зависни од Кина како што беа од Русија. „Во минатото направивме грешка што станавме зависни од руската нафта и гас. Не смееме да ја повториме таа грешка со Кина и да зависиме од нејзините пари, суровини и технологии. Зависноста не прави ранливи“, додаде тој.
Кина ги зајакна трговските и воените врски со Русија во последниве години, бидејќи САД и нивните сојузници воведоа санкции и на двете, но особено на Москва, поради нејзината инвазија на Украина. Рускиот претседател Владимир Путин изјави во четвртокот дека планира да отпатува за Кина во мај, но не прецизираше точно кога.
Свет
САД градат привремено пристаниште во близина на Газа за испраќање хуманитарна помош
Соединетите Држави почнаа да градат пристаниште во Газа, соопшти денеска Пентагон, проект кој треба да ја олесни испораката на хуманитарна помош на палестинската територија. Пристаништето треба да профункционира на почетокот на мај.
Во март, претседателот Џо Бајден објави дека американската војска ќе изгради привремено пристаниште на медитеранскиот брег на Газа за да добива хуманитарна помош по море.
Изградбата е дел од напорите да се спречи гладувањето во палестинската енклава, која веќе пет месеци се наоѓа во средината на израелската воена кампања против Хамас, која го опустоши Појас Газа и ги потопи нејзините 2,3 милиони луѓе во хуманитарна катастрофа.
„Можам да потврдам дека американските воени бродови, вклучително и УСНС Бенавидез, почнаа да градат привремено пристаниште…“ изјави за новинарите портпаролот на Пентагон, Патрик Рајдер.
ОН предупредија дека Газа е во опасност од глад и се пожалија на „огромни пречки“ при добивањето помош и нејзино дистрибуирање низ енклавата.
Агенциите за помош и администрацијата на Бајден го молеа Израел да ја олесни испораката на помош во Газа и да им дозволи на нивните конвои безбедно поминување на територијата.
Рајдер рече дека Пентагон следи некој вид минофрлачки напад во Газа што предизвика минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.
Свет
(Видео) Големи поплави во Танзанија, загинаа 155 луѓе
Во поплавите во Танзанија загинаа 155 луѓе, а најмалку 236 се повредени, изјави денеска премиерот Касим Мајалива. Во поплавите оштетени се повеќе од 10.000 куќи.
Премиерот додаде дека обилните дождови предизвикани од Ел Нино и придружени со силен ветер доведоа до поплави и лизгање на земјиштето во различни делови на земјата.
„Многу луѓе загинаа. Имаше штета на посевите, куќите, инфраструктурата како патишта, мостови и железници“, рече Мајалива.
Поплави ја погодија и Кенија, која се граничи со Танзанија на истокот на Африка, при што загинаа повеќе од 30 луѓе, пишува Си-ен-ен.
Во Кенија врне силен дожд од средината на март, а врнежите се интензивираа минатата недела. Кенискиот Црвен крст изврши повеќе од 188 спасувачки операции од март. Властите вчера затворија некои патишта во главниот град на Кенија, а неколку населби беа поплавени.