Истрагата покажа дека жената-напаѓач од трговскиот центар во Лугано била во врска со џихадист од Сирија.

Уапсената 28-годишна жена, за која се тврди дека е швајцарска државјанка, во вторникот нападнала две жени во стоковната куќа во Лугано. РТС пренесува дека таа ја фатила едната жена за вратот, а другата ја избола со ножот.

Полицијата соопшти дека сериозно повредената жртва во нападот не е во животна опасност, а откриено е дека во 2017 година, турските власти забраниле напаѓачката да премине од Турција во Сирија и ја вратиле во Швајцарија, пренесува АП.

Од швајцарскиот „Федпол“ било откриено дека жената во тоа време имала психички проблеми, како и дека била примена на психијатриска клиника веднаш по враќањето од Турција.

Швајцарскиот државен обвинител покрена постапка за можен напад со терористички мотиви – нанесување тешка телесна повреда, обид за убиство со умисла и кршење на забраната за активности со екстремистички групи како Ал-Каеда и Исламска држава.

Швајцарските медиуми објавија дека напаѓачката во трговскиот центар била совладана од двајца купувачи пред доаѓањето на полицијата, а во меѓувреме австрискиот премиер Себастијан Курц го осуди овој напад на, како што рече, исламски тероризам и изрази поддршка за Швајцарија во тешките моменти.

Претседателката на Естонија Керсти Калјулајд денеска назначи нов министер за образование, откако неговата претходничка поднесе оставка во врска со скандал со употреба на владини автомобили.

Јаак Ааб, досегашниот министер за јавна администрација, ја замени Мајилис Репс, која поднесе оставка минатата недела.

Репс, самохрана мајка, неколку пати со министерски автомобил управуван од службен возач ги праќала своите шест деца на училиште, без притоа таа да биде во возилото, објавија естонските весници.

Со оставката на Репс и трансферот на Ааб, дури четворица министри ја напуштиле или замениле владината позиција од почетокот на ноември.

Повеќе од четири милиони луѓе во светот се заразени со коронавирус во изминатите седум дена, што е највисока бројка за период од една недела, објави СЗО.

Светската здравствена организација посочи дека 4.060.891 лице биле заразени со коронавирус минатата недела и дека во истиот период починале 67.221 пациент, пренесува „Тасс“.

Една недела претходно, потврдени беа 3.977.223 нови случаи на заболување и 59.699 смртни случаи.

Тренд на опаѓање на бројот на нови инфекции е забележан во Европа и Југоисточна Азија, додека ширењето на вирусот е зголемено во Северна и Јужна Америка, со зголемување и на бројот на смртни случаи од Ковид-19.