Кинескиот претседател Кси Џинпинг повика на деескалација на конфликтот меѓу Иран и Израел, а во разговор со рускиот претседател Владимир Путин испрати речиси отворена порака до американскиот претседател Доналд Трамп, кој моментално размислува за вклучување на САД во војната, објави Си-ен-ен.

Според кинеското Министерство за надворешни работи, Кси рекол дека „меѓународната заедница, особено големите сили кои имаат посебно влијание врз страните во конфликтот, треба да работат на деескалација на ситуацијата, а не обратно“. Иако не ги спомена конкретно САД, пораката јасно беше насочена кон Вашингтон.

За време на разговорите, Кси повика на итно прекин на огнот, повикувајќи ги двете страни да ги запрат нападите, но „особено Израел“.

„Страните во конфликтот, особено Израел, треба да го прекинат огнот што е можно поскоро за да се спречи понатамошна ескалација и решително да се избегне прелевање на војната“, му рекол Кси на Путин, според кинески извештај.

Кремљ соопшти дека двајцата лидери ги осудиле нападите на Израел врз Иран, а Путин повторно понудил Русија да ја игра улогата на посредник. Кси ја поддржа иницијативата.

„Путин ја потврди подготвеноста на Русија, доколку е потребно, да преземе евентуална посредничка улога. Кинескиот лидер ја изрази својата поддршка за таквата иницијатива, верувајќи дека таа би можела да придонесе за деескалација на сегашната исклучително напната ситуација“, изјави советникот на Кремљ, Јуриј Ушаков.

Турскиот претседател, Реџеп Таип Ердоган, вчера се осврна на конфликтот на Блискиот Исток, нагласувајќи дека Иран има право да се брани, објави Анадолу.

„Сосема е природно, легитимно и законско Иран да се брани од израелската бандитска насилничка сила и државен тероризам“, рече Ердоган за време на состанокот на парламентарната група на Партијата за правда и развој (АК) во главниот град Анкара.

Неговите изјави доаѓаат во време на ескалација на конфликтот меѓу Израел и Иран. Нагласувајќи ја сериозноста на конфликтот, Ердоган го осуди и израелското раководство:

„Нетанјаху одамна го надмина тиранинот Хитлер во злосторството геноцид. Се надеваме дека нивната судбина нема да биде иста“.

„Правиме сè што можеме за да ја запреме нехуманата агресија врз Газа, Сирија, Либан, Јемен и Иран“, додаде тој.

„Крвта на масакрирани цивили, убиени бебиња и деца не само што ги испрска рацете и лицата на оние кои ја поддржуваат израелската ароганција, туку и на оние кои молчат“, истакна тој.

Ердоган потврди дека Турција останува будна.

„Внимателно ги следиме израелските терористички напади врз Иран. Сите наши институции се во состојба на готовност поради потенцијалните последици од овие напади врз Турција“, изјави тој.

„Нашата нација може да биде мирна. Владата е целосно посветена на заштитата на интересите, мирот, единството и безбедноста на Турција. Подготвени сме и се подготвуваме за секој можен негативен развој и сценарио“, заклучи турскиот претседател.

Израелскиот премиер, Бенјамин Нетанјаху, им се обрати на новинарите пред болницата Сорока во Бершеба, која претходно беше погодена од иранска ракета. Зборувајќи за улогата на САД во регионот, Нетанјаху ја истакна својата доверба во американскиот претседател Доналд Трамп.

„Претседателот Трамп ќе го направи она што е најдобро за Америка. Му верувам на неговиот суд – тој е голем пријател, голем светски лидер, голем пријател на Израел и еврејскиот народ“, рече Нетанјаху.

„И ние ќе го направиме она што мораме да го направиме – и го правиме тоа. Ние сме посветени на елиминирање на заканата од нуклеарно уништување што се надвиснува над Израел“, рече тој.

Тој, исто така, ја нагласи важноста на соработката меѓу САД и Израел.

„Морам да кажам дека партнерството со Соединетите Американски Држави, партнерството со претседателот Трамп, со кого разговарам речиси секој ден – е неверојатно. Мислам дека неговата решителност, неговата цврстина и јасност кога вели дека Иран не може да има нуклеарно оружје – е несомнена“, рече Нетанјаху.

„За да се постигне ова, Иран не смее да збогатува ураниум. Толку е едноставно“, рече тој, додавајќи: „Тој им даде можност да го решат ова преку преговори, а тие го одложуваа. И не го одложувајте Доналд Трамп – тој ја знае играта.“

На прашањето дали САД ќе се приклучат на нападите, Нетанјаху рече дека тоа е само одлука на претседателот Трамп, но додаде дека САД веќе многу помагаат, особено во одбраната на израелскиот воздушен простор.

Тој се пожали дека неговиот син морал двапати да ја откаже својата свадба поради тревогата.

Според новинската веб-страница Ynet, Нетанјаху рекол: „Целиот израелски народ ја плаќа цената. Минуваме низ напади, и тоа го поминуваме на неверојатен начин.“

„Луѓето се повредени, семејствата ги загубија најблиските. Секој од нас плаќа лична цена, а моето семејство не е исклучок – мојот син Авнер мораше да ја откаже својата свадба по втор пат поради ракетните закани. Тоа е лична цена за неговата свршеница, и морам да кажам дека мојата драга сопруга е хероина, и таа плаќа лична цена“, рече тој.