Руското министерство за вонредни состојби соопшти дека е сопрено ширењето на шумските пожари и дека опожареното подрачје е донекаде намалено во западниот дел од земјата кое веќе цел месец е погодено од рекордно високи температури

Во меѓувреме рускиот премиер Владимир Путин откако направил во текот на денот обиколка на повеќе жаришта, во недела навечер свика состанок со губернаторите на регионите кои се погодени од огнената стихија, пренесе РИА Новости. Телевизијата Росија 24, ја пренесува изјавата на портпаролката на министерството за вонредни состојби, Ирина Андријанова која изјавила дека површина на опожарените подрачја се намалила за седум илјади хектари и сега опфаќа вкупно 128 илјади хектари. „Денеска се појавија 320 нови пожари, а во меѓувреме изгаснати се 210. Во последните два дена ниедна куќа не изгоре, благодарејќи на напорите на министерството а спречени се и човечки загуби“, рекла Андријанова, пренесува агенцијата Интерфакс. До недела навечер животите ги загубиле 30 луѓе, а повеќе од 2.200 останале без покрив над главата. Од почетокот на годинава во Русија се пријавени вкупно 2.293 пожари на јавни површини кои зафатиле вкупна површина од 558 илјади хектари, од кои околу 800 се шумски пожари, пишува на интернет страницата на руското министерство за вонредни состојби. Според истата информација во шумските пожари до недела навечер изгореле 1.875 домови а без покрив над главата останале најмалку 2.210 жители. Штета е проценета на 4,6 милијарди рубљи, од кои засега се поделени само 321 милион.Со пожарите се погодени 14 региони од кои најмногу домови изгореле во Нижнегордската област – 759, во Воронешката – 291 и во Рјазанската 233 домови. „Заради неповолните метеоролошки услови во неколку области во централниот дел од земјата и во сливот на Волга, каде температурите се движат до 40 степени Целзиусови со силен ветар кој дува со брзина од 20 метри во секунда, ситуацијата е многу влошена“, се нагласува во последниот извештај од доцна вечер во недела издаден од руското министерството за вонредни состојби. Шумската служба во недела навечер јави дека на рускиот далечен исток во последните 24 часа бројката пожари трикратно се зголемила каде горат 100 илјади хектари тајга и 300 илјади хектари почва која не е под шума. појавиле три нови пожара.   Агенцијата Итар-тасс, пак, повикувајќи се на губернаторот на областа Нижни Новгород Валери Чанцев, наведува дека многу е ризична ситуацијата во околината на градот Саров каде се наоѓа сојузниот нуклеарен истражувачки центар „Арзамас -16“. Рускиот Патријарх Кирил ги повикал верниците на вечерната богослужба во Нижни Новгород да ги упатат молитвите за дожд.