Во Италија денес се одржува национален штрајк на фармацевтите од приватните аптеки – прв ваков протест во секторот. Учествуваат околу 60.000 фармацевти од повеќе од 18.000 аптеки, во организација на синдикатите CIGL и други здруженија.

Штрајкот е реакција на неуспешните преговори за нов колективен договор, истечен во август 2024 година. Синдикатите ја обвинуваат Федерфарма дека не ги признава растечките трошоци за живот и професионалниот напредок на фармацевтите.

Отворени ќе бидат само општинските и дежурните аптеки.

Бразил, кој ќе биде домаќин на климатскиот самит COP30, го претстави планот за зголемување на финансирањето во борбата против климатските промени на 1,3 билиони долари годишно, додека градот Белем во Амазонија се подготвува да ги пречека светските лидери.

Документот од речиси 100 страници, наречен „Патоказ од Баку до Белем“, е резултат на месеци разговори со различни страни по ланскиот самит во Азербејџан.

Во него се наведува дека за зголемување на средствата треба да се обезбедат повеќе неповратни грантови и да се олесни пристапот на земјите во развој до приватен капитал, а мултилатералните банки да помогнат со намалување на должничкиот товар и да преземат поголем ризик.

„Ресурсите постојат, науката е јасна, а моралниот императив е непобитен. Преостанува само одлучноста за дејствување – ова децениско време на забрзана имплементација треба да стане момент кога одговорот на човештвото ќе одговара на размерот на неговата одговорност“, се вели во документот.

COP30 ќе се одржи од 10 до 21 ноември во Бразил, а веќе се појавуваат првите предизвици за домаќинот. ЕУ постигна рамковен договор за намалување на емисиите за 90 отсто до 2040 година, а Велика Британија објави дека нема да донира пари на настанот „Тропски шуми засекогаш“, што предизвика разочарување кај претседателот Луиз Инасио Лула да Силва, бидејќи лично му пишал на премиерот Кир Стармер со барање за донација.

Лула се состанал и со претседателката на Европската комисија Урсула фон дер Лајен, со финскиот претседател Александар Стаб и со кинескиот потпретседател Динг Сјуејсијанг, барајќи нивна поддршка, пренесе Ројтерс.

Во центарот на Белград, пред полициската станица Савски Венац, рано утрово околу 4 часот, 24-годишна државјанка на Босна и Херцеговина со нож нападнала полицаец на должност, кој потоа ја ранил во ногата, дознава српски Телеграф.

Според српските медиуми, инцидентот се случил на влезните скали на станицата. Полицаецот прво се обидел да избегне повеќекратни напади и да ја совлада девојката, но таа не се откажала од нападот и покрај неговите предупредувања. За да се одбрани, полицаецот бил принуден да го употреби службениот пиштол и ја застрелал во ногата.

Девојката е однесена во болница
Девојката по инцидентот веднаш била однесена во Военомедицинската академија (ВМА). Според првичните информации, таа е свесна, комуникативна и претрпела повреда на долниот екстремитет. Полицијата спроведе истрага на лице место. Мотивот за нападот врз службеното лице засега е непознат и ќе се утврди за време на детална истрага што ќе ја спроведат надлежните органи.