Македонија треба да се гордее со учеството на своите војници во мисијата ИСАФ, бидејќи тие на најдобар начин ги претставуваат сите реформи во армијата, како и до каде се подготовките за нашето членство во НАТО, изјави претседателот Иванов, кој е во прва посета на македонските војници во Авганистан

Претседателот Ѓорге Иванов нагласил дека иако се уште Македонија не е членка на НАТО, во мисијата ИСАФ во Авганистан покажува оти ги исполнува сите обврски и се однесува како и сите земји-членки на Алијансата. Тој потенцира дека македонските мировници во оваа мисија придонесуваат и за светскиот мир и за градењето на институциите во Авганистан.„Нашите војници професионално ги извршуваат сите обврски. Почитувани се од колегите, но и од локалното население. Иако сме мала држава, на овој начин придонесуваме да се стабилизира еден дел од светот“, рекол Иванов и додаде оти ова искуство ќе им помогне на нашите војници и за следните мисии.Шефот на македонската држава во чертвртокто остварил средба со највисокиот цивилен претставник на НАТО во Авганистан, Марк Седвил. На средбата, амбасадорот Седвил го информирал Иванов за постигнувањето и придонесот на македонските војници во мисијата ИСАФ при што изразил задоволство и ја потенцирал нивната професионалност и посветеност во извршувањето на задачите. Се разговарало и за придонесот на Република Македонија во ИСАФ, за достигнувањата во процесот на транзиција, напредокот на демократските процеси во Авганистан и градењето на капацитетите на авганистанските безбедносни сили.Доцна попладне во четврток Иванов треба да се сретне и со генералот Дејвид Петреус, командант на ИСАФ во Авганистан.Придонесот на Македонија во мисијата ИСАФ почна во август 2002 година, со симболично испраќање на двајца офицери во рамки на турскиот контингент. Во моментов Република Македонија во ИСАФ учествува со 242 војници, распоредени во четири поголеми контингенти. Досега во оваа мисија учествувале повеќе од 1.500 македонски војници.