Либискиот терорист Абдул ал-Меграхи, ослободен минатата година од страна на британските власти за уривањето на авионот над шкотскиот град Локерби, паднал во кома и неговата ситуација е многу критична, јавува во четвртокот британскиот телевизиски канал Скај њуз

„Здравствената состојба на ал-Меграхи е драматично влошена, секој час за него може да е последен“, изјавил за телевизијата извор близок на семејството на ал-Меграхи. Како што додале тие, тој бил приклучен на апарати за одржување во живот од пред неколку седмици.Британските власти минатата година го ослободија и го предадоа на Либија, поради тешката болест осудениот ал-Меграхи за уривањето на американскиот патнички авион над шкотското место Локерби од 1988 г.Либиецот ал-Меграхи во 2001 г., беше осуден од шкотскиот суд на доживотен затвор за експлозијата на авионот на американската авиокомпанија „ПанАм“ во декември 1988 г. над Локерби, кога загинаа 270 луѓе. Сепак, во август 2009 г., шкотскиот министер за правда, Кени Макаскил одлучи да го ослободи 57-годишниот терорист, кај кого беше констатирана тешка форма на канцер на простатата. Според тогашните прогнози на лекарите, нему му беа предвидени само уште три месеца живот, но како што забележува Скај Њуз, ал-Меграхи е се уште жив.Британските конзервативци коишто мината пролет дојдоа на власт, признаа дека ал-Меграхи трабало да остане во затвор. Многу британски политичари од претходната власт негираат дека заканата за економски санкции од страна на Либија биле директната причина за ослободувањето на ал-Меграхи, но исто така голем е бројот и на политичарите кои се сомневаат дека натамошното негово задржување во затвор можело да им наштети на односите со Триполи.САД сметаат дека одлуката за ослободување на ал-Меграхи беше грешка и се обидоа да извршат притисок да се ревидира судската одлука.Според објавените податоци на Wikileaks кои се базираат на депешите на американските дипломати од Британија, либискиот лидер Моамер Гадафи директно му се заканил на Лондон дека ќе ги прекине сите трговски договори и ќе воведе санкции за членови на британската амбасада, доколку ал-Меграхи не биде ослободен. Заканата била упатена директно и до владата на Шкотска. Според депешата на тогашниот вршител на работите во амабсадата на САД во Велика Британија во октомври 2008 г., Ричард Лебарон, информациите за заканите ги добил од двајца официјални британски функционери кои работеле на „Даунинг стрит“ (британската влада) и во Форинг-офисот – министерството за надворешни работи. Како што пишува весникот Гардијан, од објавените документи  јасно се гледа британските медицински експерти и многумина во самата британска влада не го делеле мислењето дека ал-Меграхи „ќе живее само уште три месеца“, што беше образложението за одлуката на шкотските власти тој да биде „ослободен од сочувство“.