Свет
Тајланд гледа странска вмешаност во инцидентите со Камбоџа
Министерот за надворешни работи на Тајланд, Касит Пиром тврди дека Камбоџа во пограничниот конфликт со неговата земја може да дејствува со помош на Русија, Индија и Кина, пишува интернет изданието на весникот Nation. Во последните судири меѓу воените погранични единици на Тајланд и Камбоџа во спорната област загинаа најмалку 12 лица. Двете страни се обвинуваат меѓусебно за почеток на конфликтот. „За брзо да се постигнат неговите цели (премиерот на Камбоџа, Хун Сен) најбрз начин – е да се започне со жестоки судири, како што се случи на 4-ти февруари. И тој постигна овој успех, очигледно со помош на земји како Русија, Индија и Кина. А потоа тој поднесе жалба до Советот за безбедност на Обединетите нации против нас“, изјавил тајландскиот министер за надворешни работи Касит Пиром во средата на состанокот на Комитетот за надворешни работи на тајландски Сенатот. Тој не детализирал, како овие земји би можеле да и помогнат на Камбоџа. Според него, тој ќе отпатува во Њујорк на 14-ти февруари кога е закажан состанокот на Советот за безбедност на Обединетите нации и „ќе го објасни сето тоа“. „Јас ќе ја бранам Тајланд каде и да е. Не треба да заборавиме дека во лицето на САД имаме вистински пријател“, рекол шефот на тајландската дипломатија. Пиром е поранешен амбасадор на Тајланд во Русија, а потоа и во САД. Тој беше член на раководството на националистичкото движење ткн. „Жолти кошули“ за време на блокадите на меѓународниот аеродром во Бангкок во 2008 г., а потоа ја презеде функцијата министер за надворешни работи во владата на Абхисит Ветџаџива. Во периодот од 4-ти до 7-ми февруари во спорната граничната област се случија голем број судири меѓу единиците на армиите на Тајланд и на Камбоџа, при што беше употребен и артилериски оган а имаше и ракетирање. Во судирите загинаа најмалку 12 лица од двете страни, вклучувајќи и воени и цивилни лица. Приота се предизвикани и големи штети на административните и станбените згради од двете страни на границата. Од гранатирањата урнат е дел од зданието кое се наоѓа на спорната територија – древниот хиндуистички храм Преах Вихеар (Пхра Вихан) кој потекнува од периодот на империјата на Анкор, кој е на списокот на светско културно и историско наследство на УНЕСКО. Оваа територија е главната причина за големиот пограничен спор меѓу двете земји кој трае повеќе од педесет години. Во последните неколку седмици, и од двете страни на границата трупаат армиски сили, вклучувајќи и оклопни единици. Според аналитичарите, конфликтот кој се активира а потоа згаснува во текот на изминатите 50 години се јавува поради внатрешните политички проблеми на Тајланд. Во пресрет на општите избори што ќе се одржат во 2011 г,, тајландските националисти нагло ги зголемија активностите со нивните радикални говори и улични протести, барајќи „чистење на окупираните тајландски територии“ од камбоџанските војници и доселеници.Во 1962 г. меѓународен суд одлучи дека храмот и припаѓа на Камбоџа, но непосредната околина на храмот и натаму останува спорна и за двете страни. Во 2008 година Камбоџа за храмот од УНЕСКО доби статус на „светско наследство“, што уште повеќе го разбесни Тајланд.Во Њујорк на 14-ти февруари ќе се одржи средба на Советот за безбедност на ОН посветена на граничниот конфликт. Пред состанокот ќе се одржи средба на министрите за надворешни работи на Тајланд и Камбоџа во присуство на министерот за надворешни работи на Индонезија, кој оваа година е претседавач на Асоцијацијата на јужноазиските нации (АСЕАН)./крај/ро/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на НАТО: Кина сака добри односи со Западот и и помага на Русија, не може да ги има и двете
Кина мора да престане да ја поддржува руската војна во Украина ако сака да ужива во добри односи со Западот, изјави денеска генералниот секретар на НАТО Јенс Столтенберг, предупредувајќи го Пекинг со невообичаено остри зборови дека не може да ги има и двете. За време на посетата на Берлин, шефот на западната воена алијанса рече дека помошта на Пекинг е од витално значење за воените напори на Москва бидејќи ја зајакнува воената економија на Русија со споделување на врвна технологија, како што се полупроводниците.
„Минатата година Русија увезе 90 отсто од својата микроелектроника од Кина, која се користи за производство на проектили, тенкови и авиони. Кина исто така работи на Русија да и обезбеди подобрени сателитски способности“, рече Столтенберг. „Кина вели дека сака добри односи со Западот. Во исто време, Пекинг продолжува да го поттикнува најголемиот вооружен конфликт во Европа од Втората светска војна. Не може да ги има и двете“, предупреди тој.
Столтенберг ги предупреди западните сојузници да не станат зависни од Кина како што беа од Русија. „Во минатото направивме грешка што станавме зависни од руската нафта и гас. Не смееме да ја повториме таа грешка со Кина и да зависиме од нејзините пари, суровини и технологии. Зависноста не прави ранливи“, додаде тој.
Кина ги зајакна трговските и воените врски со Русија во последниве години, бидејќи САД и нивните сојузници воведоа санкции и на двете, но особено на Москва, поради нејзината инвазија на Украина. Рускиот претседател Владимир Путин изјави во четвртокот дека планира да отпатува за Кина во мај, но не прецизираше точно кога.
Свет
САД градат привремено пристаниште во близина на Газа за испраќање хуманитарна помош
Соединетите Држави почнаа да градат пристаниште во Газа, соопшти денеска Пентагон, проект кој треба да ја олесни испораката на хуманитарна помош на палестинската територија. Пристаништето треба да профункционира на почетокот на мај.
Во март, претседателот Џо Бајден објави дека американската војска ќе изгради привремено пристаниште на медитеранскиот брег на Газа за да добива хуманитарна помош по море.
Изградбата е дел од напорите да се спречи гладувањето во палестинската енклава, која веќе пет месеци се наоѓа во средината на израелската воена кампања против Хамас, која го опустоши Појас Газа и ги потопи нејзините 2,3 милиони луѓе во хуманитарна катастрофа.
„Можам да потврдам дека американските воени бродови, вклучително и УСНС Бенавидез, почнаа да градат привремено пристаниште…“ изјави за новинарите портпаролот на Пентагон, Патрик Рајдер.
ОН предупредија дека Газа е во опасност од глад и се пожалија на „огромни пречки“ при добивањето помош и нејзино дистрибуирање низ енклавата.
Агенциите за помош и администрацијата на Бајден го молеа Израел да ја олесни испораката на помош во Газа и да им дозволи на нивните конвои безбедно поминување на територијата.
Рајдер рече дека Пентагон следи некој вид минофрлачки напад во Газа што предизвика минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.
Свет
(Видео) Големи поплави во Танзанија, загинаа 155 луѓе
Во поплавите во Танзанија загинаа 155 луѓе, а најмалку 236 се повредени, изјави денеска премиерот Касим Мајалива. Во поплавите оштетени се повеќе од 10.000 куќи.
Премиерот додаде дека обилните дождови предизвикани од Ел Нино и придружени со силен ветер доведоа до поплави и лизгање на земјиштето во различни делови на земјата.
„Многу луѓе загинаа. Имаше штета на посевите, куќите, инфраструктурата како патишта, мостови и железници“, рече Мајалива.
Поплави ја погодија и Кенија, која се граничи со Танзанија на истокот на Африка, при што загинаа повеќе од 30 луѓе, пишува Си-ен-ен.
Во Кенија врне силен дожд од средината на март, а врнежите се интензивираа минатата недела. Кенискиот Црвен крст изврши повеќе од 188 спасувачки операции од март. Властите вчера затворија некои патишта во главниот град на Кенија, а неколку населби беа поплавени.