Рускиот премиер Владимир Путин на отворањето на средбата со американскиот заменик-претседател Џозеф Бајден, понуди да се направи историски чекор во односот меѓу двете земји и да се воведе безвизен режим меѓу Русија и САД.

Рускиот премиер Владимир Путин на отворањето на средбата со американскиот заменик-претседател Џозеф Бајден, понуди да се направи историски чекор во односот меѓу двете земји и да се воведе безвизен режим меѓу Русија и САД. „Ние сме во активни преговори за воведување безвизен режим со европските земји. САД со овие земји, речиси со сите, исто така имаат безвизен режим. Ако САД и Русија се договорат меѓу себе за воведување безвизен режим пред ова да го сториме со ЕУ, тоа ќе претставува историски чекор во развојот на руско-американските односи“, ја цитира изјавата на рускиот премиер Владимир Путин, РИА Новости. „Тоа е добра идеја“, одговорил американскиот потпретседател Џозеф Бајден. „Ако вие така позитивно одговоривте на мојот предлог, вашиот збор, како еден од лидерите на сегашната администрација која што има влијание во Конгресот, ќе биде многу значаен за нас“, реплицира Путин. Според рускиот премиер, еден таков потег ќе ги урне сите стари стереотипи во односите меѓу Русија и САД. „Ние би свртеле една многу важна страница од нашето минато и би почнале се одново“, додал рускиот премиер. На самитот Русија – Европска унија, одржан на крајот од мај и почетокот на јуни минатата година, Русија го поднесе предлог-договорот за воспоставување безвизен режим со земјите членки на ЕУ. Меѓутоа, на последниот декемвриски самит, двете страни не успеаја да се договорат за заеднички чекори за преземање мерки за детекција на проблемите и нивно надминување врзани со безвизниот режим./крај/рн/сн