Десетици илјади демонстранти ширум Јемен излегоа денеска на улиците на таканаречениот „Петок од кој нема враќање“, за да му покажат на претседателот Али Абдула Салех дека неговите понуди за реформи нема да ги ублажат нивните барања за негова оставка

Демонстрациите следат по вчерашниот предлог на Салех, главен сојузник на САД во борбата против јеменското крило на Ал Каеда, за нов устав за кој би се гласало на референдум во рок од една година и нови изборни закони кои би осигурале еднаква застапеност. Опозицијата ја одби понудата, која ја опиша како „премногу малку, премногу доцна“.Осиромашениот Јемен, кој е сосед на нафтениот гигант Саудиска Арабија, е една од неколкуте арапски држави кои беа потресени од протести и немири оваа година, што значително ја ослабна позицијата на Салех. Тој со земјата владее веќе 32 години и веќе беше крајно оптоварен поради постојаните побуни на северот и на југот на земјата, но упорно се обидува да ги смири протестите кои до сега однесоа 30 животи.Истовремено со овие демонстрации, концентрирани околу универзитетот во престолнината Санаа, на главниот плоштад „Тарир“ се собраа исто така десетици илјади поддржувачи на претседателот, кои извикуваа „да за дијалогот, не за хаосот“.