Полицијата во Мјанмар денеска уапси стотици демонстранти во најголемата акција спроведена од почетокот на протестите против воениот удар што се случи на 1 февруари.

„Дефинитивно можеме да потврдиме дека има стотици апсења“, истакнаа од Здружението за помош на политичките затвореници (ААПП), пренесе Ројтерс.

Се додава дека 10 автобуси со уапсените отишле во затвор и дека во секое возило имало помеѓу 40 и 50 лица.

„Се обидуваме да ги откриеме имињата на уапсените“, додаде Здружението.

Владата на премиерката Аунг Сан Су Чи беше соборена со воен удар.

Иранското Министерство за здравство објави дека 250.000 дози од вакцината на кинескиот производител „Синофарм“ ќе пристигнат од Кина денеска.

Заменик-министерот за здравство, Алиреза Раиси, рече дека Иран ќе добие вакцини и од другите производители, вклучувајќи ги и оние произведени во Индија, во блиска иднина, објави АП.

Руската вакцина „Спутник В“ против Kовид-19 покажува добри резултати против новите мутации на коронавирусот, изјави за „Ројтерс“, Денис Логунов, заменик директор на рускиот Национален истражувачки центар „Гамалеја“ за епидемиологија и микробиологија, кој го разви „Спутник В“.

„Неодамнешното истражување спроведено од Центарот ‘Гамалеја’ во Русија покажа дека ревакцинацијата со вакцината ‘Спутник В’ работи многу добро против новите мутации на коронавирусoт, вклучително и соевите на коронавирус од Велика Британија и Јужна Африка“, рече Логунов.

Тој додаде дека, според руските истражувачи, се верува дека вакцините базирани на вектор се всушност подобри за идните ревакцинации отколку вакцините засновани на други платформи“.