Израелскиот Врховен суд и забрани на владата да ги надгледува мобилните телефони на луѓето заразени со Ковид-19, а предлогот го означи како грубо кршење на човековите права.

Со повремено користење на овој метод од март 2020 година, агенцијата за борба против тероризмот ги надгледуваше заразените пациенти и откриваше луѓе со кои заразените стапиле во контакт, објави Ројтерс.

Од почетокот на пандемијата, невладините организации за човекови права апелираа до судот да обрнат внимание на кршењето на правата, додека членовите на парламентот изразија сомнеж во врска со ефективноста на следењето на луѓето.

Судот изрази загриженост дека набудувањето на мобилните телефони од привремената мерка може да стане трајно, затоа и даде рок на владата до 14 март да престане со следење, како и да се фокусира на заразените кои одбиваат епидемиолошки мерки.

„Се надеваме дека ова ќе ја покаже вистинската насока на владата и дека парламентот ќе го промени правецот од лизгавиот пат, користејќи екстремни и недемократски мерки во борбата против коронавирусот“, соопшти израелското здружение за човекови права.

Британскиот принц Филип, 99-годишен сопруг на кралицата Елизабета (94), е префрлен во друга болница во центарот на Лондон за да се испита претходната состојба на срцето и да се лекува од инфекција.

„Војводата останува на лекување, но се очекува да остане во болница барем до крајот на неделава“, се вели во соопштението на Бакингамската палата.

Војводата од Единбург ќе наполни 100 години во јуни. Тој беше примен во болницата „Крал Едвард Седми“ во Лондон на 16 февруари. Палатата првично одлучи да не ја открие причината за хоспитализацијата, но подоцна беше објавено дека тој се лекува од инфекција, повикувајќи се на неговите лекари кои рекоа дека е добро расположен.

Извештаите за наводната намера на медицинските лица да го задржат во болница подолго од планираното, предизвикаа загриженост за здравјето на стариот крал.

Слободата на движење во Чешка е строго ограничена во следните три недели со цел да се спречи ширењето на инфекцијата со коронавирус.

Денес полицијата започна да патролира по улиците и возовите затоа што на луѓето им е дозволено да го напуштаат својот град или село во исклучителни случаи, на пример, да одат на работа, на лекар или некое државно тело.

„Ќе бидеме насекаде, дури и на најмалите патишта“, рече портпаролот на полицијата.

Тој додаде, дека полицијата ќе биде блага, но во случај на намерно кршење на правилата, прекршителите ќе бидат казнети. Казните ќе се движат до 400 евра, а некои луѓе како што информираше, веќе се казнети.

Медиумите јавуваат дека контролите во некои области предизвикале застој во сообраќајот. Повеќе од 25.000 полицајци и до 5.000 војници учествуваат во акцијата.

Некои граѓани како што пренесуваат чешките медиуми ги критикуваат овие строги мерки на социјалните медиуми, потсетувајќи дека тоа не беше случај ниту во комунизмот. Другите сметаат дека не се доволно строги.

Владата планира да воведе задолжително тестирање на коронавирус во компании со повеќе од 250 вработени.