Сунитски имам и неговото семејство и уште четири сунити се убиени денеска во централен Ирак, неколку часа по самоубиствениот напад врз шиитска џамија во кој имаше десет жртви, соопштуваат воени и медицински извори

Во петокот рано во мугрите вооружени мажи влегле во куќата на Башир Мутлак во селото Имама Ваису, го убиле имамот, неговата жена и 11-годишната ќерка, соопштија претставници на ирачката армија и лекари од болницата во Бакуба, главен град на ирачката покраина Дијала.Група вооружени мажи во полициски униформи во вториот напад денеска убија четворица браќа сунити на возраст од 20 до 35 години, соопшти офицер на ирачката војска за AFP. Напаѓачите влегле во куќата, ги одвоиле мажите од жените, сестрите и мајката, и ги застрелале. Овие убиства се случија неколку часови откако во четвртокот навечер самоубиец ја активираше експлозивната направа во џамијата во Баладруза при што загинаа најмалку десет лица, а беа ранети повеќе до 30 шиитски аџии. Покраината Дијала е поранешно упориште на Ал Каеда и во неа владеат најжестоките етнички и верски тензии.