Свет
Десет мртви на протестите поради нападот на НАТО

Најмалку десет лица се убиени во северен Авганистан за време на протест против нападот што во текот на ноќта го извршиле НАТО и авганистанските сили, изјавиле болнички извори за BBC
Покрај тоа, како што пренесува британскиот радиодифузер, околу 40 демонстранти биле повредени во судирите во градот Талокан.Официјални претставници на авганистанските безбедносни сили изјавиле дека некои од демонстрантите биле вооружени. Тие протестираа против нападот во кој биле убиени четири луѓе, за кои НАТО соопшти дека се бунтовници. Официјален претставник од градските власти рекол дека припадниците на авганистанската национална армија и силите за брза реакција се распоредени во градот, а ситуацијата сега е „претежно под контрола“. Тој рекол и дека некои од двете илјади демонстранти биле вооружени и го нарушиле јавниот ред а уништувале и приватен имот. Градскиот функционер додал дека во Талокан било повикано засилување од соседната покраина Кундуз. Насилството кулминирало претпладнево откако во текот на ноќта започнаа протестите на гневните демонстранти откако ноќните часови телата на загинатите биле ставени на главниот плоштад во Талокан. Демонстрантите извикувале слогани против САД и против авганистанскиот претседател Хамид Карзаи, каменувајќи ја германската воена база и локалната полициска станица. Покрај фрлањето со камења, некои од демонстрантите вооружени со секири и лопати ги демолирале продавниците кои потоа биле ограбени. Водството на мисијата на НАТО соопшти дека во ноќната акција биле убиени две жени и двајца мажи. Според претставниците на Алијансата и двете убиени жени биле вооружени, едната со автоматска пушка, а другата со пиштол. Но демонстрантите инсистираат на тоа дека сите четворица убиени се цивили. Дописникот на BBC од Кабул забележува дека жените во редовите на бунтовниците се ретки, но не и дека не постојат. Тој, исто така, вели дека ноќните акции се многу непопуларни, но се ефикасни во наоѓањето и ликвидирањето на бунтовничките команданти. Ваквите напади се еден од клучните фактори на стратегијата на НАТО во борбата против бунтовниците, но многу Авганистанци, меѓу кои и самиот претседател Карзаи велат дека тие мора да бидат прекинати. Пред неколку во акција на војници од меѓународната коалиција беше по грешка убиено 15-годишно момче што предизвика жестоки демонстрации во покраината Нагахар. Притоа беше убиен еден демонстрант а петмина беа ранети.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Ердоган ја претстави турската „Челична купола“

Турскиот претседател Реџеп Таип Ердоган вчера официјално го отвори интегрираниот систем за воздушна одбрана на Турција, познат како „Челична купола“, кој го опиша како пресвртница за земјата и нејзината одбранбена индустрија.
„Ова е знак на сила за Турција. Воведуваме нова ера за нашата сакана Турција во воздушната одбрана“, рече Ердоган на настан во објектите на одбранбената компанија Аселсан во Анкара. Владата на Ердоган го објави почетокот на развојот на Челичната купола, кој интегрира платформи за воздушна одбрана и сензори од морето и копното во мрежа за заштита на турското небо, во август минатата година.
Ердоган истакна дека најновата фаза од проектот се состои од 47 возила во вредност од речиси 400 милиони евра кои ќе „влеат доверба кај пријателите и страв кај непријателите“. Турската влада не прецизираше кога системот ќе биде целосно оперативен.
„Ниту една земја која нема способност да развива сопствени радарски и воздушни одбранбени системи не може да гледа кон иднината со доверба во однос на актуелните безбедносни предизвици, особено во нашиот регион“, рече Ердоган.
Турција претходно се обидуваше да ја зајакне својата воздушна одбрана со купување на ракетниот систем С-400 од Русија во 2019 година. Сепак, овој потег доведе до тоа Американците да ја суспендираат продажбата на невидливи авиони Ф-35 на Турција, поткопувајќи ги одбранбените цели на Анкара, пишуваат медиумите.
Конфликтите во Сирија и Украина, како и неодамнешните израелски напади врз Иран, ја интензивираа потребата на Турција да развива подобра воздушна одбрана.
Ердоган, исто така, ги претстави новите производствени капацитети на Аселсан, кои треба да се отворат во 2026 година. „Во следните 50 години, Турција ќе биде земја која не само што ги задоволува сопствените потреби, туку и ќе биде лидер во светот во својата технологија“, рече тој.
Фото: принтскрин
Свет
Зеленски: Очекуваме почеток на преговорите за пристапување во ЕУ

Украинскиот претседател Володимир Зеленски денес објави дека имал телефонски разговор со претседателката на Европската комисија, Урсула фон дер Лајен, и дека ѝ се заблагодарил за нејзината солидарност со Украинците по нападот на Русија врз Украина.
Зеленски потсети дека главна цел на нападот бил Киев, како и дека се во тек операции за пребарување и спасување.
Тој изјави дека разговарал со претседателот на ЕК за дипломатска работа за „запирање на убиствата и руската агресија воопшто“, како и за гарантирање на вистинска безбедност за Украинците.
„Разговаравме и за нашиот пат кон европска интеграција, за истовременото отворање на преговарачкиот кластер за Украина и Молдавија. Очекуваме позитивна одлука во блиска иднина“, нагласи Зеленски, пренесува порталот РБК Украина.
Зеленски нагласи дека сè додека Русија не преземе вистински чекори кон мирот, притисокот врз неа мора да се зголеми.
Како што изјави, фон дер Лајен го информирала за подготовката на нов пакет санкции и координацијата со другите партнери.
Фото: принтскрин
Свет
Стармер: Путин го саботира мирот, зградата на Британскиот совет во Киев беше бомбардирана

Британскиот премиер Кир Стармер го обвини рускиот претседател Владимир Путин дека „го саботира мирот“ откако руските сили испукаа две ракети кон зградата на Британскиот совет во Киев утрово.
Премиерот потврди дека канцелариите на Британскиот совет биле погодени и додаде дека сочувствува со „сите погодени од бесмислените руски напади врз Киев“.
„Путин убива деца и цивили и ги саботира надежите за мир. Ова крвопролевање мора да заврши“, напиша Стармер на платформата X.
Британскиот совет, кој нуди програми на англиски јазик за Украинците во главниот град, соопшти дека неговите канцеларии се „сериозно оштетени“ и дека еден ноќен чувар е повреден. Во јуни, Москва им забрани на граѓаните да работат со институцијата, тврдејќи дека тоа е параван за британски шпиони.
Зградата во која се наоѓа делегацијата на Европската Унија во Киев, исто така, беше тешко оштетена во нападите, според официјални лица на ЕУ, кои го нарекоа нападот „намерен“.
Русија испали вкупно 629 дронови и 31 ракета, при што загинаа најмалку 15 лица, вклучувајќи четири деца, јавуваат светските медиуми.
Русија тврди дека во синоќешните напади гаѓала воени објекти користејќи хиперсонични ракети.
Фото: принтскрин