Јеменскиот претседател Али Абдула Салех се наоѓа во саудиската престолнина Ријад на лекување, откако беше повреден во петочниот ракетен напад врз неговата резиденција, пренесува Al Jazeera

Јеменскиот претседател Али Абдула Салех се наоѓа во саудиската престолнина Ријад на лекување, откако беше повреден во петочниот ракетен напад врз неговата резиденција, пренесува Al Jazeera„Јеменскиот претседател пристигна заедно со други функционери и граѓани кои се здобиле со различни повреди, за да бидат лекувани во Саудиска Арабија“, соопшти денеска кралскиот двор. Ракетниот напад врз претседателската палата на Салех во петокот го означи големото интензивирање на четиримесечното востание против неговото 33-годишно владеење со земјата. Опозицијата денеска прославуваше откако беше објавена веста за заминувањето на Салех во Ријад. „Јемен денеска повторно се роди“ и „Толку е, режимот падна“ извикуваа илјадниците демонстранти на улиците на престолнината Сана. Според сознанијата на Al Jazeera, Салех веднаш по пристигнувањето во Ријад бил префрлен во Воената болница. Тој се здобил со изгореници и исеченици на лицето и на градите. Сепак, шпекулациите за силината на неговите повреди и натаму продолжуваат. Кога ракетата ја погодила џамијата во неговата претседателска палата во петокот, тој бил опкружен со функционери и телохранители. Единаесет телохранители загинаа, а уште петмина високи функционери беа тешко повредени во нападот.Салех веднаш по нападот и се обратил на јавноста преку државната телевизија. Тој зборувал тешко, а била прикажана само стара фотографија од него. Со земјата сега управува потпретседателот Абд-Рабу Мансур Хади, кој ја презеде и функцијата на главен командант на армијата. Официјален Вашингтон потврди дека веднаш е остварен контакт со новиот лидер на земјата, но не наведува детали за тоа што е разговарано. /крај/aljazeera/сс/