Претседателот на САД, Доналд Трамп, потпиша извршна одредба со која се укинува преференцијалниот економски третман за Хонгконг, откако Кина воведе нов закон за безбедност во таа област.

„Хонгконг ќе се третира како Кина во иднина, нема да има извоз на американска технологија“, рече Трамп на прес-конференција.

Тоа значи дека компаниите со седиште во Хонгконг ќе мора да преиспитаат што ќе значи оваа одлука за нивниот бизнис.

„Нема посебни привилегии, нема посебен економски третман и извоз на специјални технологии“, рече претседателот на САД, кој најави ваков потег за првпат во мај, пренесува Би-би-си.

Трамп исто така потпиша закон за воведување санкции на кинеските службеници кои, како што тврди, ги кршат правата во Хонгконг, а Кина најави одговор.

Од друга страна, законот за автономија на Хонгконг, кој беше едногласно усвоен од Конгресот претходно оваа недела и беше потпишан денеска, ѝ дава на американската администрација моќни нови алатки за повикување на одговорност на оние кои ги кршат човековите права.

Во соопштението, кинеското Министерство за надворешни работи ги осуди најновите потези на САД, повикувајќи го Вашингтон да престане да се меша во внатрешните работи на Кина.

„Кина ќе ги преземе неопходните мерки за да ги заштити своите легитимни интереси“, се вели во соопштението.

Повеќе од 60 лица се повредени во судир меѓу патнички и товарен воз кај Прага.

Повредените биле пренесени во блиската болница, каде што биле згрижени.

Според првите информации, патничкиот воз налетал на воз за поштенски услуги што стоел на станицата Чески Брод, на 30 километри од Прага, пишуваат светските медиуми.

Поради несреќата, железничкиот сообраќај е во прекин на таа многу фреквентна линија.

Чешкиот министер за транспорт, Карел Хавличек, веднаш отишол на местото на несреќата.

Информацијата дека е загинат еден од машиновозачите не е официјално потврдена.

Истрагата за причината за несреќата е во тек.

Откако црногорскиот Институт за јавно здравје во системот ги внесе резултатите од 2.000 тестови кои претходно поради малиот капацитет во Црна Гора беа испратени на анализа во Германија, Црна Гора стана земја со најмногу активни случаи по глава на жител во регионот, пишуваат црногорските медиуми.

Резултатите покажале дека 475 од тестовите се позитивни. Кога на нив ќе им се додадат 66 позитивни случаи потврдени во последните 24 часа во црногорските лаборатории се добива број од 1.453 активни случаи или 231 активен случај на 100.000 жители.

Црногорските медиуми пренесуваат дека во Македонија активни се 167 случаи на 100.000 жители, во БиХ 109, Албанија 52, во Хрватска 28 и во Словенија 13. Во Србија активни се 66 случаи на 100.000 жители, но во оваа земја се пресметува бројот на хоспитализирани пациенти заболени од коронавирус.

Челникот на националното координативно тело за заразни болести, Милутин Симовиќ, рекол дека, сепак, нема да дојде до драстични мерки, како оние од првиот бран, кога имаше полициски час.

Во првиот бран, во Црна Гора имаше 324 заболени или речиси пет пати помалку од вториот бран, кој почна кон средината на јуни. Претходно, Црна Гора се прогласи за прва „корона фри“ држава во Европа и прогласи крај на епидемијата по што ги отвори границите.

Во првиот бран починале девет, а во вториот бран 16 заболени од коронавирус.