Камп наменет за потенцијалните бегалци од Сирија, е подигнат во северната ирачка провинција Наинава, пренесува ирачката телевизија „Ал-Салам“, повикувајќи се на генералниот директор на ирачката Црвена полумесечина во оваа провинција, Фалах Аијуб Хусеин.

Кампот има капацитет да прими четири илјади бегалци и како што вели Фалах Аијуб Хусеин, тој е изграден со одобрување на централните ирачки власти во регионот Рабија во близина на ирачко-сириската граница. Во моментов во бегалската населба се згрижени само шест сириски семејства. Според Хусеин, причина за изградбата бегалскиот камп се „бурните настани кои во моментов се одвиваат во Сирија“Бунтот во Сирија започна пред три месеца во јужниот град Дера’а. Немирите подоцна се проширија низ другите делови на земјата. Последните две седмици армијата на Сирија презема операции да ја врати контролата врз провинцијата Идлиб што граничи со Турција, во која поголем број области беа преземени под контрола на вооружени групи. Тоа предизвика бран од неколку илјади бегалци, од кои многу се наоѓаат на турска територија. Во турската покраина Хатиа, според податоци на турската Црвена полумесечина, се згрижени околу седум илјади сириски државјани кои бегаат пред насилствата и репресиите на тамошните безбедносни сили. За време на немирите во Сирија во судирите со безбедносните сили, според организациите за заштита на човековите права, биле убиени околу 1.300 луѓе. Спротивно на тоа, сириските власти за крвавите безредија ги обвинуваат „вооружените терористички елементи“, кои наводно се уфрлени во земјата однадвор, а во судирите со нив загинале повеќе од 340 припадници на воените и на безбедносните сили.